India-a eptu party hrang hrangten thutkhawm an neih leh tur chu July 17 leh 18 hian Karnataka khawpui, Bengaluru-ah a ni dawn tih Thawhtanni khan Congress chuan a puang.
Eptute hian tanruala BJP rorelna paih thlak an tum ber a ni a, tunah hian rorel lai hian intihchak zel tumin ‘Mumbai operation’ thlakin Maharashtra-ah eptu an thiat ve mek bawk.
Congress General Secretary (Organisation) K C Venugopal chuan Thawhtanni khan eptute thutkhawm hun tura ruat hi Twitter-ah a tar lang a, ‘firfiak tak leh mipui rorelna kalhmang lo taka kal mekte hneh turin ruahmanna an siam dawn’ tih a sawi.
“Patna-a hlawhtling taka all-opposition meeting neih a nih hnuah Bengaluru-ah July 17 leh 18, 2023 hian kan thukhawm leh dawn a ni,” tiin Venugopal hian a tar lang.
Congress General Secretary (Communications) Jairam Ramesh chuan BJP-in Maharashtra-a eptu, National Congress Party (NCP) tiphela Ajit Pawar-a leh a thuihhruai mi pariatte Eknath Shinde-a kaihhruai sorkara miniter-a lak luh an ni chu na takin a sawisel bawk.
“Nimin khan BJP Washing Machine chu Mumbai-ah tihnun thar leh niin a bawlhlo atan ICE (Income tax, CBI, ED) an hmang a, BJP hian eptute inpumkhatna tur hi tihtawp a tum hle a. June 23-a Patna-a kan lo thutkhawm tawh chu July 17 leh 18 hian Bengaluru-ah kan chhunzawm dawn thung a ni,” a ti.
“Mumbai-a beihpui an thlakna hian eptute hi a tichak sauh a ni,” tiin Ramesh hian Twitter-ah a tar lang.
Rajya Sabha-a Trinamool Congress (TMC) hruaitu, Derek O’Brien pawh Twitter-ah Venugopal-a hi a hming tilang (tag)-in ‘Bengaluru Summit. All For One. One For All’ tiin a tar lang.
A hmain NCP chief Sharad Pawar chuan eptute hi Bengaluru-ah July 13-14 hian an thukhawm leh dawn niin a lo sawi tawh a; mahse, he ni hi state thenkhatah assembly session nen a insu buai deuh a ni.
Eptu party hrang hrangten BJP leh an tanrualpuite paih thlak tuma an thutkhawm hmasak hi Bihar-a Patna-ah June 23 khan an lo huaihawt tawh a. Nakum maiah ram inthlanpui a awm tawh dawn avangin rual taka tanho an tum hle a ni.