Aizawl: ZPM chuan nimin khan an party pisa-ah chhung inkhawm an nei a, he huna thusawitu, ZPM PAC member, Aizawl East II bial vil mektu, B Lalchhanzova chuan ZPM kal dan chu party dang tan hman thiam ve chi a nih loh thu a sawi.
ZPM chu tobul mumal tak neia indin chho a, ram chhung leh pawna Zoram thatna veitute sual chhuah leh tawngtai chhuah a a nih thu sawiin B Lalchhanzova chuan, “Kan kal dan hi party dang tan hman thiam ve chi a ni lo. Inchhit ral ngamna atang lo chuan hman ngam chi a ni lo va, keini chuan kan hmang ngam,” a ti.
B Lalchhanzova chuan kum 2018-ah ZPM chu party la ni hman lovin inthlan an hmachhawn a, constituency pariatah hnehna mipuiin an chantir tih sawiin, “ZPM hminga MLA tlingte chuan ram tan hma lain assembly house chhung atangtea ram siam that hna an aupui thawm chu ruling party-te tan tawrh a hrehawm viau a ni ang, kan hotupa pu Lalduhoma chu an thuneihna hmangin an ban ta tawp mai,” tih a sawi a. Kawng hrang hrangin ZPM kal lai tihbuai tumin ruling party-ten an bei reng a, an tumah an chian em avang leh an hnung leh hmaa awm mipuiten an tawiawm that em avangin kumin MLA inthlan hmachhawn thei turin mumal taka candidate ni thei tur rel fel hmasa ber party an nih thu a sawi.
Aizawl East II bial vil mektu ZPM PAC member chuan party inrelbawl dan chungchangah beih an tawk nasa tih sawiin, “Congress leh MNF party ten an party inrelbawl dan atangin min teh a, tlawn rawn tur lal em em mi pakhat an siam thin ang bak chu party inrelbawlnaah awm theiin an ring lo a, ZPM party chu ‘hotu ngah, thu ber pawh awm lo’ min ti. ZPM chuan kan rorel dan phungah ‘thuneihna sem zai’ hi a takin kan hmang ngam a, mi pakhat rorelna angin kan kal ve lo. Kan kal dan hi party dang tan chuan hman thiam ve chi a ni lo ang,” a ti.
ZPM policy chu bihchian tham a nih thu sawiin B Lalchhanzova chuan central atanga state-in sum a dawn, lo hmanchhuahna tur atan chauha policy hming hi siam an nih loh thu a sawi a. “Hmasawnna daihrei leh tlo, tuchhuan lo la awm zel turte chhawm tlak Zoram siam tumna atangin Sustainable Development & Reform Policy (SDRP) kan ti a ni. Term khat emaw term hnih emaw chauh daih hmasawnna hi kan aupui ve lo,” tiin, kum 100 lo kal leh tur daih, Zo hnam thisen lo piang zel tur te tana chhawm theih hmasawnna lungphum phum chu an tum ber a nih thu a sawi.