Aizawl: Mizoram Excise & Narcotics (MEN) Department-in kuminah Heroin Kg 36.432 an man tawh a, nikum kum tluana an man zat aiin a tam tawh zawk a; heroin man hnem ber kum a ni tawh.
Mizoramah Heroin a hluar a, Excise, Police leh Central YMA hnuaia ruihhlo do pawl te pawhin Heroin hi thahnem tak tak an man fo a. Excise department pawhin kumin January atanga June, thla 6 chhungin Heroin Kg 36.432 an man tawh a. Nikum 2022 chhung khan Heroin kg 33.418 an man a, kumin thla 6 chhunga an man hi kg 3 chuangin a tam tawh zawk a ni.
Heroin hi 2014 vel atang khan Mizoramah a hluar nia sawi a ni a, hemi hnu hian kum khat chhunga man zat pawh a pung nasa a, kum 2017-ah khan Excise department-in kg 6.186 an man a, hei hi kum khat chhunga kg 6 an man tlin vawi khatna a ni. Hemi hnu atang hian Heroin man hi a pung chho nasa hle a, kuminah phei chuan thla 6 chhungin Kg 36.432 chuang man a ni tawh a ni.
Excise & Narcotics Department chuan Pathinni zan khan Bawngkawn, Sairang Road-ah Hawng 362 an man leh bawk a, heroin neitua puh an man tel te hi Abu Saleh Mohammad Saiyd Uddin (kum 25) s/o Abdul Fattah, 266- Near Machudhury Memorial H/S, Defolala, Karimganj, Assam leh Samir Akhtar Laskar (kum 30, s/o Manir Uddin Laskar, Gabindapur, Cachar, Assam nia insawi an ni.
Heroin phurhna atana hman TATA Intra V50 Pik-up Regn. No AS 11/EC-5379 pawh hren a ni a. Heng heroin te hi Myanmar atanga lak, State danga thawn chhuah tur a ni.