Mizo Zirlai Pawl (MZP) General Headquarters, Aizawl chuan nimin khan thuchhuah siamin tun hnaia National Institute of Technology (NIT), Mizoram leh Mizoram Assembly hnuaia thawktu hna lak chungchangah thil felhlel a awm nia an hriat thu an tar lang.
MZP chuan NIT-a thawktu lak chungchangah thil fel lo awm nia an hriat avangin ngun takin an chhui tih tar lang, “NIT hna lak kalphungah NIT awmna state mi leh sa, tling leh tlak duhsak tura tar lan a nih ang zawm lo va, ram neitute nekchep zawng leh hlamchhiah zawnga hmalakna a awm ngei tih hriat a nih avangin MZP chuan hma a la,” an ti.
NIT-a thawktu hna laka thil thleng hi tha lo an tih thu sawiin MZP chuan, “Hemi chungchangah hian NIT, Mizoram Director chu a office-ah hmuin NIT kalphung anga hna ruak hnawhkhat tura hrilh a ni a. MZP hmalakna avang hian NIT, Mizoram thuneitute chuan Mizo thalai tling leh tlak a la ta a,” tiin, an hmalakna anga NIT Mizoram-ah hna ruak hnawh khah a ni chu lawmawm an tih thu leh, hun kal zel turah NIT kalphung anga hna diltute enhrang lova dik taka la thin turin NIT Mizoram thuneitute an ngen nghal thu an tar lang.
MZP chuan tun hnaia Mizoram Assembly hnuaia thawktu lak chungchangah duhsak bik avanga thawktute vua leh vang lak an awm tih thawm awm an hriatin hma lain a chhui mek tih sawiin, “RTI hmangin document hrang hrangte dil mek a ni a. Thil dik lo leh fel lo a awm a nih chuan Mizo thalaiten an dikna chanvo an hmuh ngei theih nan hma a la dawn a ni,” an ti bawk.