NBA team Phoenix Suns chuan season thar lo awm turah champion thei tur roster neih tumin hma an la a. Free agent guard Eric Gordon chu kum hnih chhung atan an lalut.
Gordon hian kum hnih chhungin Dollar maktaduai 6 a hlawh anga, a contract a kum hnihna hi aman a duhthlanna in a hmang lo thei bawk tih a agent te chuan an sawi.
Kum 34 mi Gordon hi kar hmasa khan LA Clippers in kum khat contract, Dollar maktaduai 21 man an hnena a la neih chu hman loh an thlan hnuah free agent a ni a. Clippers hian Gordon an chhuahtir avang hian luxury tax an chawi theih tur chu nasa takin a tlahniam sawt.
NBA free agency hun inhawng tanin Gordon hi player ngaihven hlawh ber pawl a la ni a. Guard tawnhriat nei tha leh ball shoot thei, squad a player tangkai a nih avangin team tha din tumin an duh.
Kumin February khan Clippers hian Houston Rockets nen trade an neih atangin an lalut tel a, an tan game 22 khelin point 11 average a neih bakah 3 point shooting 42.3% a nei.
Suns hian an player rinrawl tur pali – Devin Booker, Kevin Durant, Bradley Beal leh Deandre Ayton te thlawp tur roster siam an tum mek a. Gordon hian NBA Playoff tawnhriat a neih tawh mai bakah team in a mamawh anga ball semtu ber pawh ni thei point guard a ni.