Mizoram Presbyterian kohhran chuan Manipur state-a buaina chhuaka biak in hal leh tihchhiat a ni chu pawi an ti a, hetiang thil titute chu an dem tak zet tih an sawi.
Mizoram Presbyterian kohhran chuan Manipur state buaina chungchangah thuchhuah siamin, Manipura Meitei leh Tlangmite inkara buaina chhuakah India danpui ‘Right to Freedom of Religion’ palzuta Kristian te’n Pathian an biakna hmun Biak In halsak, tihchhiatsak leh Kristiante thil serh bungrua chi hrang hrang tihchhiatsaka, hal sak an ni chu pawi an tih thu leh hetiang titute hi an dem tak meuh tih a sawi a, Manipura buaina chhuaka pawi sawi lo, nunau leh naupangte chena nunna lak sak an ni chu Bible zirtirna kalh tlat a ni tiin, hetianga rawng taka chete hi a dem tak zet tih an tarlang.
Presbyterian kohhran chuan, Manipur state-ah remna leh muanna a awm a, nunphung pangngaia an khawsak leh a, zalen taka Pathian an biak leh thuai chu an duhsak tak meuh meuh tih sawiin, chutianga a thlen theih nan chak taka hma la turin Manipur State sorkar hruaitute leh Central sorkar hruaitute kan phutin kan ngen tak meuh a ni, an ti.
Mizoram Kohhran hruaitute Committee-in July 8 leh 9-a Manipur buaina chungchanga tawngtai rual a rawtna chu zawmin Mizoram Presbyterian kohhran chuan July ni 9, Pathianni zan inkhawmah tawngtai rual hun hman a ni dawn tih an thuchhuahah chuan an tarlang bawk a ni.