- Ruata
Tunhnaia media report tharlam chuan India ram bike company lar leh hlun Royal Enfield-in 750cc khawl thar hmanga bike duang turin hma an lak mek thu leh hei hi kum 2025 vela tihchhuah tura an tinzawn thu an tarlang.
Khawvel huapa pawha midsize motorcycle siamchhuak tam bera chhal, Royal Enfield hian hun rei vak lo atanga an tihchhuah an bike lian ho, 650cc bike hrang hrang Interceptor 650, Continental GT 650 leh Super Meteor thar te chu tunhnaiah market lamah an chet that pui hle mai a. He an hlawhtlinna chhutzuina tur leh a khawl lian lam hoa an huang zauh nan tunah hian khawl thar 750cc khawl hmang tur lirthei an buatsaih leh mek niin a lang a ni.
British bike hmingthang ni thin, tuna India ram company hlun ni mek bawk Royal Enfield hi India ramah chuan an hming hi a dai leh mai mai tawh dawn lo niin a lang a. A vul zual zel a, an lirthei pawh an hralh tam hle a. An hralh tam zual zel pawh a beiseiawm a ni. Mizoramah ngei pawh hian bike hralh tam ber zinga mi niin tleirawl atanga upa lam thlengin an company ngainatu hi an nei a. A bike hrang hrang duhthlan turah pawh naupang lam deuh atanga upa lam thleng te ina an duh chi bike a awm vek a tih theih awm e. Tunhnaia an tihchhuah thar Hunter 350 pawh hi an hralhchhuak hnem malh malh viau a. Model dang pawh hralh a kal ngaiin a kal reng a, a leitute duh hunah an pe chhuak seng meuh lo a ni.
750cc bike hi platform thara duan tur niin a code hmingah pawh ‘R’ tih an hmang a. He platform hnuaiah hian bike hrang hrang a rawn chhuah hmel a ni. Media report-in an tarlan danin 750cc huangchhungah hian Royal Enfield chuan bobber bike an rawn tichhuak hmasa ber dawn a, a code hmingah pawh R2G tih vuah a ni a. Hei hi khawvel hmun hrang hrang India, North America, Europe leh United Kingdom atanga rawtna an hmuh hrang hrang hmangin an duang mek a ni. He bike huang thar atana ‘development work’ chu UK-a Leicester-a an tech centre-ah an tan chho mek niin media report chuan an tarlang a. He 750cc Bobber lo chhuak tur hi Royal Enfield flagship bike model a ni dawn tih an tarlang bawk.
Tunhnaiah midsize motorcycle huangah hian Royal Enfield hian elpui an ngah lutuk lo a. Amaherawhchu tunhnaiah Triumph leh Harley Davidson lam hian he huang hi an rawn luhchilh tan mek a ni a. Hetianga an kal zel a nih chuan Royal Enfield tan pawh market lamah inelna hmachhawn tur a lian ve telh telh dawn niin a lang a. Harley Davidson chuan Hero MotoCorp nen tangkawpin X 440 retro bike thar tichhuak turin ruahmanna an siam mek a, kan lo thailan tawh angin Triumph leh Bajaj tangkawp pawhin bike thar pahnih Speed 400 leh Scrambler 400 an lo phochhuak tawh a ni.
Royal Enfield 750cc khawl thar tur hi a landanah chuan 650cc chhuak mek nen hian a inang viau dawn a, hetihrual hian 100cc in a sang zawk dawn a. He khawl thar lian zawk hi North America leh Europe lamah an hralh nasat beisei a ni a. International market hrang hrangah hian Royal Enfield bike hrang hrangte hi an invawrh chho telh telh a ni.
750cc khawl chauh ni lo, 450cc khawl pawh Royal Enfield hian an duang mek a, hei hi Himalayan lo chhuak thar turin a rawn hman hmel a, hei bakah hian bike hrang hrangah pawh he khawl hi kan hmuh hmel a ni. Heng kan han tarlan tak te hi company atanga thuchhuak a ni lem lo a, amaherawhchu media report rintlak tak tak te thuchhuak a ni thung a. Reiloteah Royal Enfield atang hian thuthar te pawh kan hmuh thuai a beiseiawm a ni.