Russian Far East-a thuneitute chuan nipui thaw mekah khaw lum leh tek tla nasa avanga ram nasa taka a kan avangin Thawhtanni khan emergency an puang.
Republic of Sakha, Yakutia tia hriat bawk region-a an hotupa ber chuan Telegram messaging app-ah ramngawah hmun 110 chuangah kang mekin hectare 61,000 (acre 1,51,000) vela zau a kang tawh a, hei hi New York City hmun lia thena hmun thum ang vela zau a ni.
“Tun hnaiah khua a lum em em a, ruah a sur a, tek a tla nasa em em bawk a, hei hian tun dinhmun hi min thlen phah a ni,” tiin Aisen Nikolayev hian a ziak.
Interfax news agency chuan mihring 620 leh lirthei leh thlawhna 33 nen a thelh hna thawkin an buaipui mek niin a tar lang a. Mihring cheng an awm hnaih loh avangin nunna atana hlauhawm erawh a ni lo niin an sawi.
A zau zawng hrim hrimah chuan Sakha hi Russia-a region lian ber a ni a, mihring maktaduai khat vel an cheng.
Sakha hian kuminah ram kang thelhna tura sum an dah chu a let thumin an titam niin Nikolayev chuan May thla khan President Vladimir Putin hnenah a lo sawi tawh.
Ram kang hi tun hnaiah Russia-ah hian a tam sawt hle a, sik leh sa inthlak nasa avangin Siberia pawh a lum hle bawk a. Kum tin carbon leh boruak bawlhhlawh tonne maktaduai tam fe an tichhuak thin.
Kum 2021-a ram kan duh hun lai kha Russia-a a kan nasat ber niin ram hectare maktaduai 18.8 zeta zau (acre maktaduai 46.5) a kang chhia niin Greenpeace Russia chuan a tar lang a, hei hi Ireland let aia zau a ni.
Hmar lama Arctic Ocean nena inria awm, Sakha hi sik leh sa uchuakna hmun a ni hrim hrim a. Kum 2021-a a kan vang khan boruakah khu a chhuah tam ber tum niin North Pole thleng a zam a, hriat theih china khawvel chanchina meikhuin helai a thlen vawi khatna a ni nghe nghe.
Nikum khan Siberia pumah ram kang avangin mi eng emaw zat an thi bawk.
Khuarel humhalhtu leh zir mite chuan ram kang hian Siberian permafrost leh peatland an tihte chu a tichhe thei dawn niin an ngai a, khaw vawt leh vur khangin carbon a lo vawn ngar ngarte chu a chhuak thei dawn niin an sawi a ni.