Central YMA chuan Manipur tual chhung buaina thleng mekah mihring hlutna zahpah lo leka diriam leh nunrawng taka insawisakna thleng chu hriatthiam theih a nih loh thu an sawi.
Nimina thuchhuah an siamah Central YMA chuan tun hnaia Manipur tual chhung buaina chhuakin ni 61 chhung zet reh lam pan lova a punlun chhoh zel chu pawi an tih thu an sawi a. He buaina avanga nunna chân, hliam tuar leh harsatna hrang hrang tawk zawng zawngte a tawrhpui tak zet thu leh mihring hlutna zahpah lo lek a, diriam leh nunrawng taka insawisakna thleng phei chu hriatthiam theih a nih loh thu an sawi.
Manipur tual chhung buaina chungchang hi nimin khan Central YMA hruaitute leh Mizo People’s Convention (MPC) Manipur Headquarters hruaitute chu Tuikhuahtlanga Central YMA pisa-ah inkawm a. Buaina hi uluk taka thlir chunga hnam hrang hrangte inlungrual taka kalpui tul an tih thu leh mi mal leh pawl bil anga chet lakna hranpa nei lo va, a tul ang zela inrawnkhawm thin tha an tih thu an sawi.