Mizoram assembly rorelna sang bera hnathawktu lak dan chu a dik lo a ni tiin zirlai pawl an lungawi lo hle a. An lungawi lohna thu hi Dy chief minister hnenah hial an thlen tawh a ni. Dy CM hian lo enfiah a tiam a, zirlai pawlte hian he thilah hian a tawp thlengin kan bawhzui zel dawn an ti. Engnge thleng zel dawn tih hi tunah rih chuan hriat a ni lo a, mahse, boruak tha lo a inmung thei tlat mai. He thilah hian thil dik lo a awm leh awm loh tunah hriat ni lo mahse hunin a la rawn hril dawn.
Dik lo taka induhsaka hna lak hi a awm a nih chuan a nghawng hi a tha lo thei em em a. Zirlaite rilruah zirlai tha taka zir aiin rilru tha lo leh beidawnna rilru pian tir thei a ni. Thalai beidawng hi ram tan a pawi em em a. Buaina tha lo tak tak thlen theihna a ni. Chuvangin kan hotute hian he thilah hian dik lo a awm a nih chuan zirlaite rilru a dam ngei theih nan hma an la ngei tur a ni ang. Thil dik lo pakhat hian dik lo dang a hring zel a. Chu chu ram buaina thlentu pawh a ni thin tih hi ka thupui ni teh se.
Dik lo zawn chhuah mai bakah kan assembly house a thuneihna kan pek dan pawh hi ennawn hial a tha khawp mai. Mahni a ro inrelna neiin hna sang tak thawk tur lak theihna tura thuneihna hial kan lo pe pawh hi ennawn nghal law law nise a duhawm khawp mai. Tunhma atangin helai hna lak hian titi a ti tam tawh a. Ruling party ten an duhzawng an thun theihna department emaw tih mai turin speaker ten an chi leh kuang an thunna remchangah an hmang thin tih pawh sawi a tam tawh hle thin a nih kha. Assembly house office ah chuan speaker hlui hming a chhe zawnga sawi ngam miah loh politician te pawh an awm ni hialin sawi a ni nghe nghe!
Engatinge kan assembly house hi heti taka thuneia kan lo siam le? Governor office pawh hi a hna sang a ni emaw, sawrkar atangin a thawktu an pawt mai a. Governor office chungchangah thawktu lak dan sawi a awm ngai hauh lo. Assembly hian an mamawh hnathawktu chu sawrkar atanga an lak ve mai dan hi ngaihtuah a ngai zawk a ni.