Japan-a ruah nasa tak sur avanga tuipui kam khawpui, Atami-a lei nasa taka tawlh avanga in tam tak chhe karah nung dama lak chhuah an nei nual.
Thuneitute chuan mi 19 an chhanchhuah zingah pitar leh putar, nupa an tel thu an sawi.
Tokyo chhimthlang lam khawpuia Inrinnia chirh tawlh vakah hian mi pahnih an thi tih chian a ni tawh a, mi dang eng emaw zat chin hriat an la ni lo.
Japanese chanchinbute chuan in chim leh chirh karah nung dama chhanchhuah theih an awm beiseia hna thawk lai thlalak leh video an tichhuak.
Asahi news website chuan chhiatna thlen atanga darkar 26 hnu, nimina chhanchhuah zingah Yoshie Yuhara-i leh a pasal, Eiji, kum 75 mi ve ve an tel thu an puang a. Lei tawlhin a chhilh dawn lai hian khawl lian tak ri ang maia thawm a awm thu leh chhawng thuma sang an in chung lamah an tlan chho va, a hnuai lam chu lei tawlhin a hnawl zui ta niin an sawi.
Lemchan thiam kum 55 mi, Naoto Date chuan a pianna khuaa thil thleng en tur hian Inrinni khan a haw nghal a. “Thil thleng ka hmuh khan tah vak ka châk ber,” a ti.
“Upa tak tak an cheng teuh va, mahnia insaseng thei lo an ni tih han hriat phei chuan rilru a na zual hle,” a ti.
Khawpuia chengte chuan lei tawlh hian an ram sanaa Inrinni chawhma dar 10:30 (India-a zing dar 7:00) vela an khua hi a hnawl thu an sawi.