- HC Vanlalruata
Mizote hi rik hlut ching, arbawm hal ang mai a ri hluai a reh leh mai ţhin kan niin a lang a. Chutih lai akan ţhenawm state a tharum thawhna namen lo a awm lai a kan pawl liante leh kohhran lamte an ngawi thei em em mai hi chu a mak ngawt mai. Kan unau Zofa 100 chuang an thi tawh a, an khaw 200 ţhelha in 7,000 chuang halsak an ni tawh bawk a. Pathian biakin leh thawktute chenna 359 hal a nih tawh bakah kan unau Zofa 41,425 te chu mahni in lum luah ngam lovin an awm mek a ni. (ITLF Media – Kuki-Zo Statistics Update, 02 July, 2023).
Tharum thawh ve ila, Mizorama him taka awm Mizote chhul-khat-kual ni ve lote lakah thinrim hrithla ve ang u, ti zawnga chetlâk a awm lo hi a lawmawm tak zet a. Kan state muanna kan vawnghim hi a lawmawmin kan sakhaw zirtirna nen pawh a inmil hle a ni. Chutih lai chuan Mizoram mipui zingah social media lama han inhrithla bawrh bawrh an awmte pawh hi hriatthiamna nena dawh a ngaih chin a awm ang chu.
Thuthlung Hlui hunlai ang a, “Mit aiah mit, ha aiah ha,” ti lova muanna kan la vawnghim hi Mizo hnam kan puitlin leh remna leh muanna duh hnam kan nihna lo lanchhuahna langsar tak pakhat pawh a ni awm e. Kum 20 zet ranbuai tawh hnu-a Mizo mipui ngenna leh duhdan a Mizoram tana zalenna sualte ramhnuai aţanga lo haw a, an ralthuam tung a, tun thlenga state ralmuang berte zing ami kan la ni thei ta zel pawh hi remna leh muanna duhtu (peace loving) hnam kan nih vang a ni.
Chutiang a nih mek lai chuan kan ţhenawm, kan depah thlahtu thuhmun kan unau Zofate’n namen lovin tharum thawhna an tuar mek a. Manipur-a hnam lian ber Meitei-hovin an state sorkar chakna hmachhuanin kan unaute thatin, an in leh lo bakah an Pathian biakin tam tak an hal/tihchhiatsak tih kan hre vek a. Chutianga kan unau Zofa, Kristian ni bawkte’n ni 61 zet tharum thawhna an tawrh hnu chauhva (Thawhţanni)-a MKHC leh Presbyterian kohhranin thuchhuah an siam ve ta chauh kha mak tih loh rual a ni lo.
Mizorama pawl lian ber Central YMA pawhin Manipur aţanga sahimna zawnga rawn raltlante ţanpui kawnga an thawh ţhat viau lai hian Manipur-a kan unaute thlavang hauh nat deuh erawh chu an tlin lo tih a lang chiang tawh a. Churachandpur-a ‘inti Mizo’ bik riaute inzawmkhawmna pawl thurawn duap tak an lak ţhin vang ni maw? Keimahni’n Mizoram a a taka kan tawrh ve loh avanga unaute, kan Kristian pui ngeite hlamchhiah a thlahthlam kan ang ta ber mai.
Kan unau Zofate lakah hlei an len a, tharum an thawh mai a ni satliah tawh lo a sin. An Chief Minister N. Biren Singh-a Manipur state sorkar hian firfiak pawl Arambai Tenggol leh Metei Leepon-te bakah an state Police te hmangin kan unaute hi nuai chimih a an ram chhuhsak hi an tum ber a ni tih a chiang tawh a. Kan unaute chêp dan tur hi kan suangtuah thiam mai awm e. Chu mai pawh ni lovin kan ram dep Cachar district khawpui Silchar a hmunpui nei All Assam Manipur Youth Association (AAMYA)-te chuan Mizoram chu kan chak lâkna kawngpui ber dangchat a, ei leh bara hrekah min vau tawh kha.
July ni 2 zing khawvar hma a Langva khua, Churachandpur district a David Thiek, an thah tawh a hnu hmana a lu an tan a, palah an tar tih thute han hriat hi chuan Mizo pangngai thinlung chu chemte a vih angin a na vawng vawng tur a ni ringawt. Chutiang a nih avang erawh chuan Mizoram aţangin tlangval rual, ralthuam nen thawk chhova tharum hmanga kan unaute thlavang han hauh lam kan sawi lo. State danga thilthleng a nih avangin kan sorkar leh mipui pawhin tih theih chin tawk kan nei a, tharum thawh zawng phei chuan chetlak a rem lo tih kan hre vek.
A hmun (Manipur) a thil awmdan thlithlai a han kal a, han zirchiangtu National Federation of Indian Women (NFIW)-in an thil hmuh an sawite hian rilru chu a tina zual. Anni hi Delhi hmunpui nei, India ram huap pawha pawl lian tak an ni a, ‘vai’ emaw ‘ringlomite’ ti a kan sawi ţhinte an ni. Manipur-a kan Zofa unaute nena thisen inzawmna nei lo leh Kristian sakhaw zuitu inkhawm tlut tlut an nih a rinawm lem loh. An general secretary hi a hming bulah ‘Annie’ a dah avangin Kristian chu a ni mahna. Rahul Gandhi han zin kha chu politics thila hlawkna atana kalah BJP chuan an puh mai thei a, awm lo lutuk pawh a ni hranpa lo.
Mahse, Mizo pawl lian leh kohhran lam an ngawi rei lutuk hi chu Prime Minister Narandra Modi ‘ngawi rei lutuk hi a ri a ring em a ni’ (deafening silence) ti a an sawi ang chiah hi kan pawl lian leh sakhaw lam hruaitute ngawi thei lutuk nen hian a tehkhin theih awm a sin. A taka kan tawrh ve loh avanga kan state ţhenawma kan unaute tawrhna kan uipui tuilian thlir liam mai mai thei hi chu a mak thlawt a ni.
Kan ţhenawm ram Myanmar leh Bangladesh aţanga raltlan rawn lutte hi kan unaute tho an ni a, kan lo ngaihven a kan lo tuamhlawm hi kan tihtur dik tak a ni. Chutih rual chuan kan unau dang, India rama kan chenpui leh khua-leh-tuite tawrhna răpthlâk tak chungchanga kan ngawi rei thei a, kan ngawi rei ta lutuk hi chu inenlet ngei chu kan ngai. ‘Thu chauh, hla chauh’ piahlama kan unaute thlavang na zawka kan hauh hi a hun ta takzet a ni.
Mizoram a political party ding hmasa ber Mizo Union khan Zofate chenna ram insuihkhawm a rorelna pakhat hnuai a awm an lo tuipui daih tawh a. MNF party pawhin kum 1961 a an din ţan aţang tawhin an thupui ber pakhatah an dah nghal. Chief Minister hlui Brig. T. Sailo pawhin kum 1988 khan Zofate insuihkhawmna pawl (Zo Reunification Organization –ZoRO) dinin hma nasa takin a lo la tawh a. MPCC leh ZPM te pawhin ngaih pawimawha an neih a ni.
A kohhran ang zawng pawhin (kan hotute ţawngkauchheh ka’n hawh teh ang) Manipur Presbyterian kohhran khi Mizoram hrin a ni a. Kum 1910 khan Savawma, Vanzika leh Taitea ten Bible tracts leh Mizorama Pathian thu an chhut ang ang kha Senvawnah an han phur a, kha kha a bul ṭanna a ni a. A phuntu tak chu sap ni lovin R. Dalla a ni. Saptlangvala (Robert Watkins) nen Thahdo Pioneer Kuki Mission an din a, R. Dalla kha a dintu leh thawk zuitu a ni a, Saptlangvala hian sapramah sum a tuak thung a ni. (Thu lakna : Lalhruaitluanga Ralte)
Hetianga Mizoram hrin kohhrante biakin tam tak hal chhiat a nih a, kohhran mite an mangang a nih chuan kohhran lam pawh hi a tak taka an chet chhuah a hun a, tlai tawh ti a, kan sawi rualin ţanpui an la ngai dawn chauh pawh niin a lang. Chutiang bawkin kan tlawmngai pawl leh zirlai pawlte pawh hian tharum thawh zawng ni lovin, Manipur-a kan unaute thlavang hi na deuh taka kan hauh a hun tawh takzet a ni.