Aizawl: Mizoram Kohhran Hruaitu Committee (MKHC) chuan Manipur state-a chi leh chi inkara buaina chhuakah sakhua hmun hmate, biak in leh kohhran bungrua hrang hrangte inzahsak lo taka tihchhiat a ni chu an dem thu an sawi.
Nimina thuchhuah an siamah MKHC chuan Manipur tualchhung buainaah remna leh muanna a lo awm leh thuai theihnan rang tak leh chak taka hma la turin central leh state sorkar bakah pawl hrang hrang hruaitute an ngen.
MKHC chuan kohhranten mahni theih ang anga buaina avanga in leh lo chânte, ei leh bar tlachhamte leh himna zawnga raltlante an chhawm dawl chu bansan mai lo va, mahni remchan dan leh theih ang tawk tawka chhawmdawl hna thawk zel turin an ngen bawk.
He buaina hi a lo reha, remna leh muanna a lo awma, hnam hrang hrangte lungrual taka khawi hmunah pawh kan lenza theihna turin kohrhan hrang hrang tual chhung kohhranten mahni remchan danin July 8 & 9, 2023 tawngtaina hun hmang theuh turin MKHC chuan an ngen.