Aizawl: Mamit District Development Coordination & Monitoring Committee (DISHA) chu nimin khan an chairman C Lalrosanga, Lok Sabha MP kaihhruaiin Mamit DC Conference Hall-ah an thukhawm.
DISHA thutkhawmah hian Mamit District chhunga Department hrang hrang hnuaia Central Scheme hrang hrang kalpui dan te tarlan a ni a, line department te’n scheme hrang hrang an kalpuinaa harsatna hrang hrangte an neihte sawi chhuakin a tul anga bawhzui dan turte an rel.
Thutkhawma an tarlan danin, Tun dinhmunah Mamit District-ah MGNREGS hnuaiah Job Card 22340 a awm mek a, kum 2022-23 chhungin Ni 100 inhlawhna siam tawh a ni a. Jal Jeevan Mission (JJM) hnuaiah khaw 91-a chhungkaw 18171 te chu tui connection pek an ni.
Kum 2022-23 kal mekah PMGSY PWD Mamit Division hnuaiah Phuldungsei to Parva-tui Road siam mek chu hnathawh tur atanga chhutin zaa 75 thawh tawh a ni a, Tuipuibari to Andermanik road siam mekah hna zaa 95 thawh tawh niin Andermanik to N.Belkhai road siam mek pawh hnathawh tur zaa 4 thawh tawh a nih thu tarlan a ni bawk.
National Health Mission (NHM) Mamit District hnuaiah khaw 90 a mihring 100867 tuam mek a ni a. Tun hnaiah Population wise-a mihring thi tlem ber, Health Minister Award lawmman pakhatna dawn a nih thu tarlan a ni. Samagra Shiksha Mamit District hmalakna hrang hrangte tarlan a ni bawk.
DISHA thutkhawmah hian Dampa bialtu MLA Lalrintluanga Sailo, Mamit bialtu MLA Er. H. Lalzirliana bakah district sorkar hotute leh DISHA member te an tel a ni.