Russia chuan Ukraine an rûn avanga khawthlang ramten an hrekna chu a dodal zel dawn niin President Vladimir Putin-a’n a sawi.
Shanghai Cooperation Organisation-a ral atanga a telnaah thu a sawi a, hei hi thla hmasaa Russia-a sipai pawl khat helna a chhuah hnua ram dang hmaa thu a sawina hmasa ber a ni.
Putin-a hian SCO ramte inkarah anmahni pawisa theuh hmanga sumdawnnaa thawhhona siam a ni chu tha a tih chu a sawi a, hei hi an hrekna a do let vena pakhat nia ngaih a ni.
2023 SCO summit hi India kaihhruaina hnuaiah kal khawm lova neih mek a ni.
Putin-a hian he intawhkhawm hi khawthlang ramten an hrekna a tihlet vena remchangah a hmang a, “Russia chuan pawn lam atanga hrekna, nekna leh tihthaihna hi a dodal zel dawn a, a hmaa a kal danin a kal zel ang,” a ti bawk.
June thla tawpa hun reilo te chhung Wagner mercenary group an hel hnuah khan Putin-a hi vantlang hmunah a inlan nual tawh a; mahse, tun hi ram dang hruaitute nena an inkawm leh an inhmuhna hmasa ber a ni.
Moscow-a Kremlin atanga thu a sawi hi television-ah tihchhuah niin, “SCO-a tel ramten Russian hruaituten danpui hnuaia thupek anga hma an lakna leh khua leh tuite himna atana an chetnaah an thlawpna avangin lawm thu ka sawi duh a ni,” a ti.
Putin-a chuan Chinese leh Russian-te inkara insumdawn tawn nana pawuisa hman 80% chuang chu yuan leh rouble a nih thu a sawi a, hetiang hi SCO-a tel ram dangte pawhin kalpui ve se a duh thu a sawi.
SCO summit neih leh hun atanga Russian thawhpui, Belarus-in member nghet a nihna a dil pawm a ni chu lawmawm a tih thu a sawi bawk.
Indian Prime Minister Narendra Modi chuan SCO ramte chu sumdawnna, inpawhna, technology leh thil danga thawhhona tichakna tur a nih thu a sawi.
Hetih rual hian Ukraine-a indona emaw, China-in Indo-Pacific-a huang a zauh mek zel chungchang chu a sawi lang miah lo va. India hi khawthlang ramte nen a insuihzawm ngheh deuh deuh zel avangin tun hma atangin tu lam mah tang bikin a awm ngai lo.
Tun hnai lawkah pawh khan Modi-a hian US tlawhin Washington-ah ropui taka dawnsawn a ni nghe nghe.
Modi-a hian an chhehvel himna erawh a sawi lang a, hetah pawh hian China a lam chhuak chuang lo va. Indian leh Chinese sipaite hi ramri-ah kum 2020 khan nasa taka inepin tun thlengin chin fel tak tak a la ni lo.
Khawthlang ramte hian India hi China dodal turin an duh bakah an lamtang angin an ngai deuh va; mahse, Delhi hian vantlangah tan lam a sawi ngai lo va, SCO-ah ngei pawh a sawi lang leh chuang lo.
Hetih rual hian Modi-a hian ramri kâna firfiaka chetna lakah erawh member ramte chu tanho a tul thu a sawi thung.
“Ram thenkhat hian ramri kâna firfiaka chetna hi an hmang thin a, mi firfiakte an kawl a, SCO chuan hetiang ti thin ramte hi kan ngaizam tur a ni lo,” a ti.
Hetianga Modi-a sawi hi an thenawm, Pakistan a sawina a ni deuh ber a. An prime minister, Shahbaz Sharif pawhin SCO ramte hian ‘sualna pathum firfiakna, hleihluak taka chetna leh inlak hran tumna’ lakah khauh taka a chet a tul tih a sawi ve bawk.
Chinese President Xi Jinping chuan an chhehvel muanna leh himna a pawimawh thu a sawi a. SCO-a tel ve dangte chu ‘kawng dik zawha inlungrual leh inringtawna che zel turin’ a sawm bawk.
SCO member-te hian thukhat vuaa an inlungrualna chu kum hnih liam taa US sipaite inthiar chhuaka Taliban-ten ro an rel leh mekna, Afghanistan chungchangah a ni.
Thuchhuah intawm an siam zuiah pawh SCO ramten Afghanistan tana a huhova an thawhna tur pawh an tar lang a ni.