Aizawl : Social Welfare Minister Er Lalrinawma’n nimin khan Aijal Club-ah Social Welfare & Tribal Affairs Department leh Aizawl Art Gallery tangkawpin thalaite tana lemziah huang programme thlakhat chuang an buatsaih kharna hun a hmanpui.
Social Welfare Minister chuan art tih mai hian lemziah piah bakah thu leh hla literature te, rimawi te leh hnam ziarang thil thlengin a huam nia a ngaih thusawiin art hian a huamzau a, Mizo khawtlang nunah phei chuan zai leh hla bakah rimawi ten dinhmun sang tak changin kan ngaihlu in kan rilru a hneh hle a ni, a ti.
Tunlai thangtharte zingah Mizo pipu thawnthu zirtir tha tak tak nei, hria leh chhiar an tlem hle nia a hriat thusawiin kan pipute thawnthu kha a ropui a, kan thalai leh thangtharten heng thawnthute hi kan hmelhriat mai nilovin kan hlut a tul a, hengte kan hlut thiam chu hnam ziarang chawikanna leh humhalhna a ni tel zel a ni, a ti bawk.
‘Tribal Art & Craft, Young Artist’s Sustainable Development’ hi Ministry of Tribal Affairs bultuma neih thin a ni a, a tum ber chu tribal thalaiten an hnam ziarang leh chanchin te lemziah leh thil siam hmanga, an lantir leh phochhuah thei nan remchanna siamsak a ni. He programme hi Aizawl Art Gallery in an buaipui a, thalai art lama tui mi 67 a inziaklut a, thlakhat chhungin art lama mithiamten an enkawl chho a ni.
Programme kharna hi C. Laldinpuii, Joint Director, Social Welfare & Tribal Affairs in a kaihruai in programme in a tum te a sawi a. Thusawitu dang Angela Zothanpuii, Director, LESDE chuan art leh themthiam thil hrang hrangte chu skill development a nih dante sawiin mahni tuina zawng eizawn nana hman chu thil tha tak nia a ngeihthu a sawi a. Laltanpuia, Chairman, Aizawl Art Gallery chuan programme hman dan report tawi a sawi bawk a ni.
He programme a lem an ziah (painting) leh thil an siam(craft) chu endik niin a tha ber 3 thlanna nei a ni bawk a. Painting ah 1-na chu Vanlalruata Pachuau, Hlimen niin 2-na chu Zomuanpuia, Thingdawl a ni a, 3-na chu Isak Lalthutiama, Sesawng a ni a. Craft ah 1-na chu Laldinmawia, Melriat niin 2-na chu F. Malsawmzuala, College Veng a ni a, 3-na chu Lalenkawla, Keitum a ni. Special Award chu vohbik lemziak thiam R.L. Thanmawia pek a ni bawk.