Thla hmasaa Vaivakawn Zohnuaia lei min chu tun hnaiah nasa takin a min belh a, hemi avang hian chhungkaw pangain an chenna in an chhuahsan a, leimin hian National Highway 54 kawngpui a hnawh ping.
Vaivakawn khawtlang hruaituten The Zozam Times an hrilh danin, Thawhtanni chawhnu lama ruahsur lai vel khan lei hi min tanin, leimin hian NH-54 kawngpui chu lirthei eng chi mah kal theih lohin a hnawhping a, lei hi che zui zelin Thawhtanni zan dar 12 leh dar 1 inkar vel khan nasa takin a min leh.
Leimin hian Lalramthanga Sailo-in concrete building chu dinhmun hlauhawmah awmtirin, he ina cheng chhungkaw pangate chu an inthiar chhuak a, hei bakah hian a bul hnaia motor workshop-a bungrua te pawh thiar chhuah a ni a. Leimin avanga in chhuahsante hi an thenawmte leh an chhungte inahte an awm lailawk rih a ni.
Thawhtanni chawhnua lei a min tan tirh atang khan PWD Highway Division 1-a thawkte chuan lei tla then fai hna hi an thawk tran nghal a, leimin avanga kawngpui ping thenfai hna hi nimin nileng khan PWD te hian an thawk a. Leimin hian electric hrui thenkhat a tichhe bawk a, chung siam that hna chu P&E lamin an thawk bawk a ni.
Aizawl Mayor Lalrinenga Sailo chuan nimin khan leiminna hmun leh leimin avanga Zohnuai atanga Chawlhhmun panna kawng chhuat khi te chu a tlawh a, PWD thawktute nen hmalak zel dan tur an sawi ho a, leimin avanga in him lo neitu, Lalramthanga Sailo chhungkaw hnenah tanpuina Rs. 50,000 a hlan a ni.
Leiminna hmun hi vawiinah DM&R leh a kaihhnawih dang department hotute leh leilung lam mi thiamten an enfiah leh dawn a ni.
Tar lan tawh angin Vaivakawn Zohnuai-a Lalthantluanga te kawmthlang hi June 16 khan nasa takin a min tawh a, hemi avang hian chhungkaw 11-in an in luah lai an lo chhuahsan tawh a ni.