Mizoram Chief Minister Zoramthanga’n Manipur tual chhung buaina chin fel dan kawng awm apiang dapin, a rang thei ang bera ngaihtuah a ngai takzet tawh thu a sawi.
Nimina social media-a a official Instagram leh Twitter account kaltlangin chief minister hian kumin May thla tira buaina chhung chu nimin thleng khan a la reh lo a. Buaina a ziaawm zel beisei a nih laiin a punlun ta zawk a, a reh hun tur hriatthiam har tawh tak a nih tawh thu a tar lang.
Chief minister hian Manipur buaina avanga hliam tuar leh nunna chân te, in leh lo chânte leh buaina avanga harsatna hrang hrang tawkte a tawrhpui tak zet thu leh Pathian thlamuanna leh awmpuina a dilsak tih a sawi.
Manipur buaina avangin sakhaw hmun serh biak in hal leh khawih chhiat te, tualthahna leh buaina nghawng tawrhna rapthlak tak tak thlalak leh video te hi hmuh belh tur awm tawh lo se a duh tih a sawi a. “Buaina chin fel dan hi kawng khat chauh a awm a nih pawhin ching fel tura hma lak nghal ni se tih hi ka duhdan a ni,” a ti.
Zoramthanga chuan he buainaah hian mi tam takin nunna an chân tawh a, thisen tam tak a luang ral tawh a, hliam tuar leh sahimna zawnga hmun dang pan mi tam tak an awm belh zel tih sawiin, “Chung zingah chuan ka chipui Zo-hnahthlak tam tak an tel a, kan chipuite tawrhna chu kan tawrhna a nih miau avangin ngawihsan theih a ni lo,” a ti bawk.
Nunrawng taka nunna inlaksak leh insawisakna thlengte chu a demawm lehzual tih sawiin Zoramthanga hian, “A tuartu ni lo tan pawh mihring mihrinna thinlung atang pawhin nunna inlaksak chu hriatthiam harsa tak a ni,” tia sawiin, buaina chin fel dan kawng awm apiang dapin, a rang thei ang bera ngaihtuah a ngai tak zet tawh tih a sawi a. Loh theih lohva mawhphurtute tan tun hi chet hun tha ber a nih thu leh buaina rapthlak tak hi lo tawp tawh se a duh tak zet tih a sawi a. Buaina chinfel dan kawng rang taka ngaihtuah leh chet lak nghal hi mawhphurhna la ngei ngei tura ngaihte mawhphurhna leh an tihmakmawh a nih thu leh, remna leh muanna a awm thuai nan kawng zawn nghal ni se a duh tih a sawi.
Manipur buaina avanga sahimna zawng Mizorama rawn tlan lutte hi sorkar chhinchhiah danin mi 12000 chuang an ni tawh a. Manipur, Myanmar leh Bangladesh atanga raltlan, Mizoram sorkarin a lo tuamhlawm leh enkawl zat hi mi 50,000 chuang an ni mek bawk.
Heng raltlante leh sahimna zawnga Mizorama rawn tlan lutte enkawlna leh chhawmdawlna tur central sorkar atanga puihna an dil pawh hi a rang lama pek thuai a beisei thu chief minister hian a sawi a ni.