Zo Reunification Organization (ZORO)-in Meitei leh Zo hnam te Manipur sorkar hnuaia awmho reng chu thil theih a ni lo tih a chiang tawha an ngaih thu an sawi a. Manipur-a Zofa ten rorelna hran an ngiat chu an thlawp thu an puang nawn.
ZORO chuan Meitei Chief Minister leh a thawhpui Minister leh party mite bakah Meitei khawtlang hruaitute thusawi atangin Zo hnam nena inrema sorkar pakhat hnuaia chenho an duh tawh lo tih a chiang niin an sawi a. “Thla hnih kalta chhung khan Manipur-a Zofate leh Meitei te chu an inthen fel thlap tawh a, rilruah an inpawh lo mai ni lovin an inhlat tial tial a, engkimah ramri a inkham fel ta a ni ber” an ti.
“Manipur sorkar, police leh civil mi te chu Meitei thuhnuaiah vek an awm a, inthup lovin Zofate nasa takin min bei a, dan mumal a awm lova, hmun hrang hrang atangin ‘India sorkarin thuneihna la mai se’ tia rawtna a awm reng chungin Biren-a kaihhruai sorkar chu a la ding nghet tlat a, Meitei mipui pawhin an thlawp tlat a ni” tiin, ZORO chuan hei hi Zofate tan chuan Meitei nena rorelna intawm a beidawnthlakzia tichiangtu a nih thu an sawi.
Meitei hovin Zo tlangval David Thiek lu tana, Biak in bula an tar leh a taksa chan sawma diriamna hleihluak lantira an hal zui ta chu Zofa ten engtikamah an theihnghilh tawh loh tur thu ZORO chuan an sawi a. “Meitei leh Zofate hi sorkar pakhat hnuaia awm ho thei kan ni tawh lo” an ti bawk.