Aizawl: New Delhi-ah All India Congress Committee (AICC) President Mallikarjun Kharge kaihhruaiin Mizoram Pradesh Congress Committee (MPCC) hruaituten kumin 2023 MLA inthlanpui lo awm tur atana ruahmanna hrang hrang an sawi ho.
Thawhlehnia AICC pisa-a thutkhawmah hian AICC President Kharge chuan kum 2024 a BJP sorkarna titawp turin Mizoram inthlan a pawimawh tih thu a sawi a. Kumin 2023-a state hrang hrang inthlanna turah Congress party-te chak ngei tura a beisei thu leh, chumi zingah chuan Mizoramah pawh chakna an chan ngei theihna turin theihtawp an chhuah dawn thu a sawi.
MPCC President Lalsawta pawhin Mizoramah BJP-te hmanrua ni thei lo awm chhun chu Congress party chauh an nih thu a sawi a. India ramah sakhaw zalenna tun din a nih zel theihna turin Mizoram mipuiten Congress sorkar an nghakhlel tawh hle niin a sawi a. Mizoramah kum nga chhung MNF-ten rorelna an chan chhungin ram sum leh pai a tlahniam a, mipui an mangang a. ZPM chu anmahni leh anmahni an intihchhiat miau avangin Zoram mipuiten Congress party-te hi sorkar turin beiseina sang tak an neih thu a sawi.
Congress party hruaitu Rahul Gandhi pawhin hmarchhak state zingah Mizoram chu Congress party thatna ber a nih thu a sawi a. Kum 2024 India ram inthlanpui lo awm turah sorkarna Congress party-in a chan theihna tura a hmahruaitu atan Mizoram inthlan chu a pawimawh tih sawiin, Congress Party chu sorkar ngei tura tan la zel turin a fuih a. Mizo mipuite hmu tura Mizoram tlawh ngei a tum thu a sawi bawk.
Thutkhawmah hian MPCC aiawhin President Lalsawta bakah Treasurer Dr. Lalmalsawma Nghaka, Spokesperson Dr. Lallianchhunga, CS Thanga, General Secretary, i/c AICC; Vanlalawmpuii Chawngthu, President, Mahila leh MPYCC President Laltawnliana Sailo-te an tel.