Corporator pahnihin GANC building zau hna thawh mek en

Aizawl North II bialtu MLA Dr Vanlalthlana leh AMC ward III Corporator C Lalchhandami te chuan nimin khan Ramhlun North-a Government Aizawl North College (GANC) building zauh hna thawk mek an tlawh.

GANC building zauh hna hi RUSA hnuaiah Rs.150 lakh senga sak zawh tura ruahman a ni a. October 2019-ah hna hi thawh tan niin, November 2022-a thawh zawh tura ruahman a ni. Skyridge Construction & Consultancy Services in RUSA hnuaiah Rs.21,37,00,000/- work order an hmun hmangin Mizoram college hrang hrang sak hna an thawk mek zinga mi a ni.

Dr. Vanlalthlana leh C. Lalchhandami te hian GANC sak a nih danah hian thil fel tawk lo awma hriain, sak chhunzawm a nih danah duhthusam tawk lohna lai tam tak a awm niin an sawi a. Hna a nihna tur anga thawh a ni lo leh thawh zawh hun chhung tura ruahman anga thawh zawh a ni lo chu an ngaihmawh bakah, hna an thawh muan avanga zirlaite tana class kal theih loh phah hialna a thleng chu pawi an tih thu an sawi.

Tuna hna la thawh zawh lohte pawh hi a rang thei ang bera thawk zo va, zirlaite hmalam hun thui tak an kutah a awm a ni tih inhria a, zirna in tha leh zahawm tak siam turin hnathawktute pawh an chah nghal.

Leave a Reply

error: Content is protected !!