Manchester United chuan England midfielder Mason Mount chu Chelsea atang an lakluh thu an puang.
Kum 24 mi hi Erik ten Hag-a’n tun nipui chhunga player a lakluh hmasak ber a ni a. Pound maktaduai 55 a manah an pe tla phawt anga, a bak Pound maktaduai 5 la inpek belh leh thei an ni.
Mount hian kum nga contract a ziak a, kum khat dang ziah belh theihna a awm.
A chawrchhuahna club Chelsea chhuahsan a United a thlan chhan chu Mount hian sawiin, “Manager nen kan inbiakin a ruahmanna te a sawifiah a, hengte hi tha ka ti a, season thar atan ka phur tawh hle.”
“Erik ten Hag hnuaiah club in nasa takin hma a sawn tih tupawhin an hmu vek. Tum sang tak nei ka ni a, trophy lak nawmzia leh a hautakzia ka hria. Manchester United-ah hian hengte hi tawng leh turin ka theihtawp ka chhuah ang.” tiin Mount chuan a sawi.
Mount hian Manchester United a number lar ber seven a ha dawn a. Tunhnaiah rawlthar beiseiawm Alejandro Garnacho chuan a ha dawn nia thuthang awm mahse United in an player thar chunga rinna an nghah thukzia an lantir.
Chelsea tana vawi 195 khel tawh Mount hi Manchester United football director John Murtough chuan, “Mason hi football fing tak, technical footballer tha tak a ni. Kan squad neih nasa takin a tichak ang. Hun rei tak atanga talent tha tia kan lo thlir tawh a ni.” tiin a sawi.
Mount hi England tan vawi 36 inkhel tawhin goal nga a khung tawh.