Aizawl leh Mizoram hmun hrang hrangah ruah a sur duh hle mai a, tunlai hian tlai lam pisa kai ho haw hun hnaihah a sur duh zual.
Ruahtui tlak tam avangin lei a nghet lova, Aizawl tlaklamah leimin awmin, hei hian kawngpui pawimawh a hnawh ping a, Sakawrtuichhun lamah motor an kal a ngaih phah. Hei vang hian Vaivakawn pengthuam pawh a lun phah hle thin.
Thawhlehni tlai a ni a, a dan ngai bawkin ruah a tla tam leh hle mai. Pisa kai ho hawn hun vanglai a ni chho a, zin veivak lirthei lah an hunbiah chiah chiah an tlan theih rih miau loh avangin ruahsur hnuaiah pawh an tlan ve zel tho a ngai a. Kawngpui chu a lun hle.
Traffic police duty na hmun tur hulhliap chu awm tho mah se, pengthuam tinah duty an awm tho a ngai a, indaih loh a na tawh si, motor tlan an vang lai chho a ni bawk nen.
Chutih hunah chuan Mizopa, mizo tlangval, duty tura dah traffic police tan tawm hul mai mai chi a ni lo. A pheikhawk a phelh a, chumi tlaia haw tur motor inpel suau suau chu buai miah lovin an kal dan tur a pharsak zel a, amah lah chu a huh nasa ngang mai. Kha traffic police duty kha khawii lai bathlarah emaw tawm hul rih pawh nise tumahin an dem lovang a, an sawisel kher lovang. A chhan chu ruah kha a sur nasa em mai a. Mahse, duty hlen tura kha laia awm a nih hrechiang em em tu tan chuan midang buaina thleng thei laka ven kha a tihturah a ngai lui tlat a, ruahsur bur bur hnuaiah pheikhawk phelh meuhin, ruah do meuhin phur takin zu han phar lauh lauh thei zel a!
Mizo tlangval kha hmuh a ni a, Mizo tlawmngaihna vawngtu, midang chunga buaina thleng tur ngaingam lova inpe kha khami tlai khan hmuh a ni nawn leh a ni. Mizote hi kan nun a la chhe vek lo ania.