Roman Catholic kohhran hotu lu ber, Pope Francis chu a rilpui lama harsatna a neih zai turin Rome damdawi inah dah a ni.
Vatican thupuangtu, Matteo Bruni Gemelli University Hospital-a zai zawh a nih hnuah chiang zawka puan a nih tur thu a sawi.
Pathianni tuk khan kum 84 mi ni tawh, Argentine Pope hian St Peter’s Square tlawhtu mi sang chuang hmaah thu a la sawi.
Kum 2013-a hotu lu ber nihna a chelh hnua damdawi ina dah luh a nih hmasak ber a ni.
Vatican-in thuchhuah a siamah chuan a rilpui hi a chak tawk lo va, a natna benvawn niin a lo insawisel fo tawh.
Pum a tipuar a, pum a tina a, pum lampang harsatna dang dang a thlen thei bawk.
Pathiannia St Peter’s Square-a thuchah a sawinaah Pope hian September-ah an ram thenawm, Hungary khawpui, Budapest-a Mass a lawm zawhah Slovakia a tlawh zui leh dawn thu a puang.
Kum 1936-a Buenos Aires-a piang, Francis hian kum 21 lek a nih laiin a chuap ding lam paihsak a lo ni tawh.
Mawngtam bawr nuam lo a nei reng a, sciatica-in a tibuai fo bawk a, hei hian a ke hnung lam a tichak lo hle thin.
Kum 2014 pawh khan a pum lam fel lo avang hian a tih tur pawimawh eng emaw zat a lo thulh tawh bawk.