Manchester City in defender thar lakluh an tumna kawngah an tum angin thil a kaltluang lova, fel thuai tura ngaih kha inremna a la awm lo niin an sawi.
European champion lai hian RB Leipzig atangin Croatia defender Josko Gvardiol chu lakluh an tum a. Tunkar khan inremna an nei tawh angin football journalist langsarten an sawi.
RB Leipzig sports director Max Eberl chuan English club nen hian inremna engmah an nei lo tih Zirtawpni khan a sawi.
Kum 21 mi hi Leipzig in a man atan Pound maktaduai 86 vel an chhiar a. Hei hi City in an ngam chuan khawvela defender manto ber a ni dawn.
Inremna an neih chungchang zawhna chhangin Eberl chuan, “Thuthang a tam a, hmun hrang hrang atang sawi vel a tam. Josko chungchanga thu darh thar ber pawh hi keini lam pawhin mak kan ti viau.”
“Tun dinhmunah inremna kan nei lova, kan indawrnaah kan dinna a la inhlat hle. Kan hriat tlan angin Josko hi kan hnenah a la awm a, heng thuthangte hi dawt a ni.” tiin a sawifiah.
Gvardiol hian kum 2021 July a Dynamo Zagreb atang Leipzig a zawm hnuah vawi 87 inkhel tawhin Europe a defender tha ber zingah hetih chhung hian a invawrh lar a. Croatia tlarhnungah rinrawl niin vawi 21 a inkhel tawh.
July thla tir atang khan Eberl hian City nen hian inbiakna an nei tan tih a lo sawi tawh bawk.