- Reuben Lalnunthara Hnamte
Pathianin mihring a siamin a huhova awm hova intihlim tawn a, intanpuitawn turin min din a ni a. Chutiang bawkin kan thlarau lam nun chawm a, kalsualna laka min veng turin kohhran min pe leh a. Kan ramah sap missionary te lokalin Kohhran an rawn din a, tichuan YMA an rawn din leh bawk a. Hmanlai atang tawhin kohhran leh YMA hi inpawh tak leh rual taka kalin hma n an la ho thin a ni. Kan thlarau lam nu n mi kaihruai tura kohhran kan mamawh ang bawkin mihring ni a kan chen hona kawngah kawng dik leh tha te, khawtlang nun nuam te siam intanpuitawn turin YMA hi a pawimawh hle a ni. Tunlai thangthar nun kalzelah hian kohhran leh YMA hi inhlat tir hret hret a ni ta em aw a tih theih a. A nihna takah chuan Pathian rawngbawlna kan tih hi thlarau lam nun chauh a ni lo va, vantlang tana pawimawh, mihring nun khawchhuahna tura pawimawh inkaihhruaina leh intanpuitawnnate hi a tel vek a ni. Vantlang nun inkaihhruaina chu YMA in a kalpui ang a, chu chu rawngbawlna pawimawh tak a ni. A awmzia kan man tawk loh avang hian kohhramn leh YMA hi hrang hle anga ngaihna kan nei tlat thin a ni.
A nihna takah chuan kohhran Biakina inzir rem chiah lo leh kohhran anga khawtlang nun inkaihhruaina rem chiah lo hi tam tak a awm a. A bikin thalaite hi nunkawng dika kaihhruai ngai leh midangte tanpuia, midangte tana malsawmna ni tur zirtir hi an pawimawh hle mai a. Hei tak hi mihring nuna kan nun khawchhuahna tur leh kan khawtlanga tanpui ngaite tanpui tur ke kan pen hona tura kaihruaitu pawimawh tak chu YMA hi a ni. Mizote anga YMA kan tih ang hi khawvel ramdangah a awm kher lovang. Mizote hi hnam danglam tak, tlawmngaihna kalpui thin kan nih avang hian kan sap missionaryte khan kan nundan phung hrechiang takin YMA hi min lo din sak a ni. Hnam anga din kan lo nihnaah kan hnam nun tingheta chawikang turinn YMA hi a pawimawh hle. YMA hi awm ta lo se chuan mizo thalaite hian kan hnam nunphung hi kan hloh nasa ngawt tawh ang. Chuvang chuan kohhran anga inzirtir leh inkaihhruai rem chiah si lo, kohhran nena thawhona tura remchang tak kan mi hmasa ten min lo dinsak hi thil lawmawm tak a ni.
Mizote chu hnamdang ang lo takin chhiatni thatni thuah te kan hnam kalphung a mawi hle a. Chumi tinunga chawikangtu chu YMA hi a ni. Kohhran chuan khawtlangah pawh YMA takin hma ala anga, chumi bawhzuitu chu YMA te an ni. Kohhran hrang hrang alo awm a, kan khawtlangah pawh kohhran a tam hle a, chutianga kohhran hrang hrang a awm kan nih avangin kohhran mal ina khawtlanga hma a lak remlohna a awm thin a. Chu tak chu YMA chuan kohhran duh dan ang zelin kohhran hranga awm khawtlang mipuiteah hma a la thung dawn a ni. Kohhran mi kan nih avanga YMA hlamchhiah ngawt hi kan tih tur a ni lo va, chutiang bawkin YMA em em ringawta kohhran hlamchhiah hi kan tih tur a ni lo bawk. Mi tamtakin kohhrana inhmang tak chu YMA hruaitu ah a tih chi loh ti anga ngaihdan te kan nei fo thin. Chutiang bawkin khawtlang leh YMA inhmang takte chu kohhran hruaitua tha lo ni ang hial ngaihna te a awm thei thin a ni. Hei hian YMA leh kohhran inepna a thlen thei a, he ngaihdan hi lo pu kan awm pawhin kan paih a tul hle.
Chuvangin kohhran leh YMA rawngbawlna leh a nihna chin hi kan hriat a tul hle a, indipdal lova, rual taka kalpui hi a pawimawh em em a ni. Kohhran leh YMA te hi inthurual taka rawngbawlho tur kan ni a. Kohhrana inhman em em a YMA thlauh thlak emaw, YMA a inhman avang kohhran thlauhthlak te hi thil tha a ni lo. Tin, Kohhran leh YMA a kan inhmanna ah pawh midangte aia kal fawr bik lutuk awm hi a tha lo. Kohhran leh khawtlanga inhmang takte avang hian kan khawtlang leh kan hnam a mawi thin a, mizo nih hi a nuamin a thlamuanthlak thin a ni. YMA avang hian chhiatni thatni thuah te ava thlamuanthlak thin em! Chuvangin Kohhran chuan YMA dal zawngin hma an la lovanga, YMA pawhin kohhran dal zawngin hma an la lo bawk ang. Kohhrana inhmang tak, YMA a kula taia tang thin te hi hmuh an va nuam em! Chutiang bawkin YMA inhmang tak kohhrana hnarkaitu an nih tlat thinna te hian Mizo nih hi min timawiin, hnamdang hmuhah pawh mizote min chawimawi thin a ni. Chuvangin khawvel hnamdangin an awh em em kohhran leh khawtlang inlungrual taka kalho hi I uar sauh sauh ang u.