Aizawl : School Education Minister Lalchhandama Ralte chuan mahni hnam changkansan a hlauhawm tih a sawi.
Ningania Hrangbana College-a ‘Youth 20- Meet on Nationalism, Patriotism & Development’ hun buatsaiha khuallian nia a hmanpuinaah Lalchhandama Ralte chuan, “Mizo thalaite hian eng nge kan ngaihtuah ve ang? Vawiin niah hmasawnna, changkanna, nationalism hi kan thinlung a ni a. Changkanna leh hmasawnna kan tih hian mahni ram, mahni hnam kan changkansan ang tih hi ka hlau a ni,” a ti.
Lalchhandama Ralte chuan, “Mahni tawng hre lo, ziak thiam lo, mahni tawnga biak theih loh thalai changkang lutuk kan tam ang tih hi a hlauhawm a. Khawvel changkannain hnam a thansan ang tih a hlauhawm,” tia sawiin, ‘I thunlung kha i hnamah kir rawh’ tih hi sorkarin a duh leh a zirtir mek avangin naupang te te-ah, elementary stage-ah mahni hnam tawnga zirtirna kalpui an bei mek tih a sawi.
Korea culture, Western culture, Indian culture ngaihsan a, mahni hnam leh hnam thil ngaisang lo a awm theih a, chu’ng zawng zawng ata hruai let an nih a, an awm theihna turin elementary stage atangin bul tan a ngai tih a sawi a. Zirlaibuah pawh milem chuang te reng reng pawh a Mizo thei ang bera dah a nih tak zel thu sawiin, “Mizo hnam zia hi Mizo thalai thinlungah tuh kan tum a, naupang atanga kan tih thar loh chuan he hnam hi reiloteah a piangsual dawn tih kan hmuh avangin sorkarin chumi tur chuan kawng dik kan zawhnaah hma lam pan turin hmasawnna hi hnam thinlung pu chungin thanglian rawh se tih hi kan thupui pawimawh tak a ni,” a ti bawk.