Aizawl: Aam Aadmi Party (AAP), Mizoram chuan chawlhkar kalta Zirtawpnia BJP pisa kawta an punkhawm chhan an sawi fiah.
Thuchhuah an siamah AAP chuan, Manipur-a Meitei leh tlang mite inkara buaina chhuak chungchangah central leh Manipur state-a rorel lai BJP chu an mawhphurhna hlen zo lo leh, an khua leh tuite humhim zo lovah a ngaih avangin ‘Peaceful Demonstration’ huaihawt an nih thu an tar lang.
“Manipur buaina chungchangah India leh Manipur-a rorel lai BJP hmalakna kan duh khawp loh vang a ni. He mi chungchangah hian Mizoram BJP hian buaina tireh turin theihtawpin central-a sorkar lai BJP nawrin, hma la se kan duh a, kan duhna ti langin kan pungkhawm a, buaina siam emaw, harsatna siam emaw kan tum lo a ni,” tiin, Mizoram BJP pawhin central lama an hotute bia a, remna leh muanna a awm theihna turin tun aia nasa zawka hma la tura an phut thu an tar lang bawk.
AAP chuan Mizoram chhunga buaina tipunlun zawng emaw, hmun danga awm Zohnahthlak unaute himna tiderthawng thei zawnga hmalak tha an tih loh thu te, Manipur buaina avanga Mizoram chhunga himna zawnga raltlante buaipuina kawnga Central YMA leh NGO hrang hrangte hmalakna an thlawp thu leh an tan hian an tih theih apiang tih an inhuam thu an tar lang.