France defender Samuel Umtiti chuan Barcelona in an chhuahtir hnuah French club Lille a zawm.
Kum 29 mi hian Barcelona a zawm hma hian Ligue 1-ah hian inkhel tawh thinin Olympique Lyonnais kawr a ha tawh thin. Lille hnenah hian kum hnih contract a ziak.
France tana World Cup trophy latu team a tel tawh Umtiti hian tunhnai kum li chhungin inhliam neuh neuh avangin team-ah inkhelhna hmun nghet a chang hleithei thin lova. Season liamta khan loan in Italian club Lecce tan a khel.
“France a lo kir leh tur hian ka rilru ka siam hnuah ngaihtuahnaah Lyon an lo lang hmasa ber a, mahse a tawpah erawh keimah min duhtu club ka zawm ta a ni.” tiin Umtiti chuan a thutlukna a sawi.
Cameroon a piang centre-back hi Lyon chherchhuah niin an hnen atangin kum 2012 January khan professional football a khel tan a. An hnena a khelh chhungin French Cup-ah an champion.
Lyon tan hian vawi 170 inkhel tawhin kum 2016 khan Barcelona a zawm a. Tunhnaiah Lyon-ah bawk hian kir leh tura sawi a ni hman a, amaherawhchu Lille a thlang ta zawk.
Kum 2018 World Cup semi-final-ah khan Belgium laka an chakna goal khungtu a ni a, nimahsela kum 2019 hnuah ram tan a la inkhel leh lo.
Ram tana inkhelh leh a duh avangin club thar a zawm tih sawiin, “France tana inkhelh boruak hi ka tem tawh a, hun ropui tak tak kan tawng tawh. Khang hun hlimawm tak takte han tawn leh kha ka duh a ni.” tiin a sawi.