Aizawl South I MNF Block chuan MNF sorkar hnuaia PWD hnuaia hmasawnna hnathawh thenkhatah ZPM-in a taka hnathawh hmuh tur awm lo anga an sawi chu an hriat chian loh vang niin a sawi.
Thuchhuah an siamah Aizawl South I MNF Block chuan PWD department atangin hmasawnna chi hrang hrang – Special Assistance of State for Capital Expenditure (SASCE), Special Assistance of State for Capital Investment (SASCI) leh Socio-Economic Development Programme (SEDP) kaltlangin hmasawnna hmuh a nih thu an sawi a. June 27, 2023-a ZPM party in Lokayukta a an FIR theh luha an tarlan Rs crore 8.11 tih pawh kha an thil hriat chian loh vang niin an tar lang.
Thuchhuah an tar lan danin, he’ng development project pathum hnuaiah hian Rs crore 9.48 chuang hmuh a ni zawk a. Chu’ng zinga hna pakhat ‘Construction of Concrete Pavement on College Veng field to PUC to Bethlehem Vengthlang kawn’ ZPM party-in SASCE hnuaia thawh anga an tarlan pawh hi SASCE hnuaia mi ni loin, SASCI hnuaiah sum ruahman Rs 19,34,618 hmanga thawh zawk a nih thu tar langin, “A taka hna thawh hmuh tur awm lo anga an sawi leh, khawtlang hruaitute pawhin a hna thawhna hmun an hriatpui lo anga sawi hi thu belhchian dawl lo leh, a dik lo zawnga mipui rilru hruai pen tumna niin a hria a, pawi a ti tak zet a ni,” an ti.