- Lallunghnema, Charity Lodge
Chhiartute chibai ka buk hmasa a che u.
Chhiartu atangin feed-back ka dawng zel a. Ka hlim hle. Keini hi zawngin kan thil buaipuiah hian hlawkna hmu lo mahila, â takin chan huamin kan bei ve fan fan a.Intifingho,fing zik tluak si lo consumer right engah mah ngai lo za rual ai chuan mi tlemte,consumerte veiho hi an hlu hle zawk a ni.
“Kan kal zel dawn e, Zion fate, mihlim ho tih ang deuhvin miten min lo uksak lo mahse,” Kan bei zel dawn!Kan hneh hma chuan,” kan ti a ni.
Consumer right ka vahvaihpui Pu C. Rohnuna te, Pu Sangpuia te, Upa M. Thansiama te, Pu Lianchungnunga te Dan thiam Maria leh Mary te hi min fuih phurtu an ni a. Anni bakah CAG, Mizoram a ka thiante hi an fel em em a, consumerte humhalh kawngah an phur hle hlawm.Hengho hi mi changkang ka ti lo thei lo!Ka Kawipa Prof. Rualkhuma Colney hi ‘fing taka’ min nawr kaltu a ni. Ralkhat atanga min chawmtu ka thian duhawm tak takten min nawr kal zel a. Chhimlamah Pu Lalrochama, Leitlangpui mi ril leh chhak lamah Pu Mangaia te, Pu Dinpuia leh Pu Zonuna of Serchhip te hi ka chakna bul an ni zel!
Ka thianpa M. Thansiama of Lunglei tawnhriat hi ka’n phochhuak teh ang. Pawi a ti lovang chu maw? Ka lo tithinrim ta a nih pawhin ngaihdam ka dil hreh love.Mahse, a huat ka ring lo! Pu Lian!
Tichuan, Upa M. Thansiama whatsApp message hi i lo chhiar phawt teh ang u.
“Aizawl New Market pheikhawk zuarah khan Rs. 3900/- man ka lei a, a nalh ngiang mai. Vawikhat ka bun a, a chung a chuar nghal ve ve. Ka pheihkhawk ang chiah hi online-ah an rawn zuar a, Rs. 999 a lo ni a. Ka fimkhur loh man ka hmu chiang khawp mai’. An dawr ka kal leh hunah hrilh ve hrim hrim ka tum”. UiKei chuan, ” Hrilh rawh, nem dam reih rawhin… Hrem theih a nih thu pawh hrilh a tha”
Ka thianpa MCS(rtd) MPSC a Member lo ni tawh, pa fel elkhen chu keini mi hnuaihnung buaipui consumer right hi a lo vei ve hle ni tur a ni. A thil leina a MRP phuahchawp cash memo an pek thlalak chu min thawn a. He dawrkai hi ngeiawm tak a ni.
Heti hian a ziak a… Rs. 425 an thai chhia a, 500/- an ziak chawp. Hetiang hi 4 ka lei a, Rs. 300 aia tam an hlep a nih chu! Kei chuan hlep ka ti lova, ‘eiru’ ka ti duh zawk a ni. Consumer-te rawkna a ni. Lehkhabu zuartu thenkatte hian hetianga a man dik zawk thaichhia a, a man phuahchawp bel hi an ching em em a ni. Hetiang complaint hi ka lo dawng tawh thin a ni . Lehkhabu dawr pakhat, a neitu pawh ka rawngbawlpui a ni a. A pawi khawp mai! Anni ho dawrkai rinawm lote hi kohhrana mi tangkai tak tak an ni duh phian leh nghal a.
Bungraw man dik tak tihchhiat a, a man phuahchawp, markar hmanga ziak chingho hi ‘Ka sual rit tak phurh leh lei ninawm hi’ tia lam er zak zak an ni duh phian leh nghal a. Miten min chhiar, min thlir reng e’ ti chung zelin bumna thang an la kam zel ni fa hmiang!
Pu C. Rohnuna thu leh hla hi i lo ngaithla ve thung teh ang u,
“Kan rama sumdawng ho hi vai aiin an phakar zawk daih a ni. Aizawla dawrah hian pheikhawk eng pawh, a chhuat, ke artui zawn velah hian MRP tih ziak hmuh tur a awm miah lo,ka kal ve phak Orissa Bazar, dawr lianah tr, Calcutta Big Bazar leh Silchar an Bazar leh Dimapur Bazar-ah MRP vekin thil a lei theih a ni. Mizoram Kristian ramah hian hetiang thai chhia a ziak chawp duh, Sunday School a ‘Awm’ ti thin hi kan tam awm e”. Ngaihtuah zui tlak a ni.
Eng pawh ni se,hei hi i zirho teh ang u le! Saptawngin bul ka han tan leh phawt ang e. Min lo hre thiam teh u.
Deficiency of Service:
” State Consumer Commission Directed DHL to Pay Compensation For Lost Phone” – —Maharashtra State Consumer Disputes Redressal Commission dismissed an appeal by DHL Express Pvt Ltd and held it guilty of deficiency in service awarding Rs 25000/- towards the loss of the iPhone and mental agony with interest rate of 9% per annum. Cost of Rs. 8000/- and additional cost of Rs. 3000/- to the complainant.
Hei hi thil awmdan chu a ni:
Complainant hian iPhone Rs. 45000/- man, a thianpa Seychelles-a khawsa mek chu a leisak a. Tuipui ral ram hla takah thawn a ngai a.Tichuan,Shipping charge Rs. 3915/- package a lei nghal bawk a. He complainant IPhone lei hi a thianpa kutah ni 10 chhungin a thleng hman ang tih Transport Company lam hian an tiam a.
Mahse, ni 10 hnu fe pawhin a thleng ta reng reng lo mai a! Complainant mangang chuan a thil phurhsaktu DHL hi a va bia a. Anni chuan kalkawngah he IPhone hi a bo a ni tih an lo hrilh a. Zangna dawm nan dollar 100 ( za ) pek an lo tum a. Mahse, complainant chuan a pawm lova. A rilru na thawi dam nan District Consumer Commission hnenah zualkovin complaint a thehlut ta a. Tichuan, hetiang hian Consumer Commission chuan DHL hi thiam loh chantirin pawisa a chawitir ta a ni.
Consumer Court-a thubuai remtu zinga ka awm ve lai pawh khan bungraw bo complaint kan dawng fo mai. A tlangpuiin heng bungraw phurtu te hian thiamloh an chang chawk a ni. Kan thu leh hla atang hian zir tur i nei.
Tunlai chu,Dawnfawh lei cbungchangte,scooty insurance chungchangte,Laptop lei chungchangte hian min tibuai mek!.. a khirh viau hlawm a ni.
Centre For Consumer Education,
I tan kan ding e.
I hriat duh zawt la,
An lo chhang ang che.
Tanpui tura i sawm chuan
An lo pui ang che.