Aizawl : MPYCC General Headquarter chuan tun hnaia North East Youth Congress Co-Ordination (NEYCC) Vice Chairman a thlan MPYCC President Laltawnliana lawmpuina inkhawm zirtawpni khan an pisa-ah an buatsaih.
Inkhawmah MPYCC Vice President Lalsanglura Sailo chuan thu sawiin, MPYCC President a nih atanga reilote-ah NEYCC Vice Chairman a thlan tlin a ni nghal chu thil ropui tak a nih thu a sawi a. MPYCC in lawmpui inkhawm buatsaih a, chawimawina thil pek hlan hi a phu an tih thu a sawi.
NEYCC Vice Chairman thar Laltawnliana pawhin thu sawiin, NEYCC Vice Chairman a thlan a nih chu phulo a in tih rualin, chona nasa tak a pek thar thu a sawi a. NEYCC hian hmarchhak a cheng state hrang hrang te tan hma nasa tak in an la dawn a, BJP sorkarin Hindu lal ram din an duh luat avang a, an tawrh mekna leh harsatna dang lo awm zel thei lakah pawh nasa leh chak zawkin hma an la thei dawn niin a sawi.
July 19,2023 khan North East India State tin Congress thalai hruaitu te chu Waii International Hotel, Bhalukpong, Arunachal Pradesh-ah meeting an nei a. He meeting-ah hian NEYCC hruaitu thar thlan nghal niin, NEYCC Vice Chairman atan hian Laltawnliana chu thlan a ni.