Aizawl: I&PR Minister Lalruatkima hovin Inrinni khan Vaivakawn Zohnuai chuan hnuaia veng chhung inkalpawhna a chhiat avanga chhungkaw thenkhatte harsatna tawh an enfiah.
He leimin avang hian hmar lama cheng chhungkaw 20 velin kawngpui pawhtu chakkhai lakna tur leh veivahna tur kawng mumal an neih loh avangin harsatna an tawk nasa hle a. Minister ho hian helai hmuna cheng ten kawngpui awlsam taka an pawh theihna tur kawng awm thei te dapin NH-6/306 (Hunthar – Vaivakawn, Sairang Road) lam atanga kawng siam dan turte an enfiah a. A kham ko a san avangin thutlukna siam nghal mai a harsa an tih bakah PWD (Highways) hotute nen a rang thei ang bera thutkhawma ruahmanna siam dan tur ngaihtuah ho nise an ti.
Vaivakawn Zohnuai (Ropaiabawk Peng) Vaivakawn thlanmual bul hi June 16, 2023 zingkar khan nasa taka minin, a thlang kawngpui NH 6/306 chu hun eng emaw chen a dang ping a, chhungkaw 16-in an chenna in luah ngam lovin an chhuahsan tawh a ni.
Minister Lalruatkima hi AMC, DM&R, Aizawl DC, Zonal, PWD, Geology & Mining leh DIPR official te bakah Vaivakawn Local Council leh YMA hruaitute an tawiawm a ni.