British pop rock band lar chak tak The 1975 chu Kuala Lumpur-a Good Vibes music festival neih mek atangin petchhuah an ni a, an zaipui leh bassist te stage-a in kiss vang leh Malaysia sorkar-in taksa anpui kawpte laka a hmalak dan sawiselna vangin ni thum awh festival-ah an tel phalsak lohnghal an ni.
Video darh pakhatah an puipia Matty Healy-a’n bassist Ross MacDonald chu a chuk a, Malaysia sorkarin LGBT te hmelma ang hrima a umzui thin a sawisel chiam bawk.
Malaysia ram hi Muslim tamna ram a nih vangin Homosexuality hi dan bawhchhiatna lian tak a tling pha.
Boruak a muanawm loh tak vangin Healy hian an zai hun chhung titawi nghalin mipui lamhawiin, “A tha e. Kan kal mai ang. Kuala Lumpur lamin min khap tlat mai bawk si a, inhmuh leh kan tum thuai dawn nia,” tiin a sawi.
Good Vibes festival huaihawttute chuan thuchhuah siamin, The 1975 te inlan chhunzawm theih loh chhan chu dan leh hrai duansa an zawm loh vang, an ti.
Malaysia sorkara communications minster Fahmi Fadzil pawhin band chet dan chu na taka demin, ‘Inzah lohna tawpkhawk’ a ti. He thil thlengah hian tualchhung thuneitute bakah festival huaihawttute chu insawifiah ngei turin a hriattir mai chu duhtawk lovin ni thum awh festival hi zirtawp zan khan organiser te a hmuh hnuin titawp nghal turin a hriattir.