Mexico-a mipa pakhat chu bar pakhat atanga an hnawh chhuah hnuah a hal zui nia puh niin man a ni a, kangmei chhuakah hian mi 11 an thi tih thuneituten an sawi.
He thil hi Zirtawpni zana United States nena an inrina, San Luis Rio Colorado-a thleng niin bar hi ramri atanga kawtthler pakhat chauhvin a daidan a ni.
Thuneitute chuan zu rui pakhat. la valai tak chu Beer House bar atang hian Molotov cocktail an tihna atangin an hnawt chhuak niin an sawi.
Hmeichhe awm ve dangte chungah mawi lo taka a chet avanga hnawh chhuah niin an sawi bawk.
San Luis Rio Colorado mayor chuan Pathianni chawhnu khan man a nih thu Twitter-ah a tar lang a. A hming erawh a sawi lang lo.
Kangmei chhuakah hian mipa pasarih leh hmeichhe pali an thi a, mi pali dang damdawi inah dah an ni bawk tih Sonora state Attorney General’s Office chuan a puang a. Hliam tuarte hi ramri kânin United States-a inenkawl tura lak an ni.
“Thil thleng hmutu tam tak chuan mipa la valai tak hian bar chhungah hian hmeichhe awm vete a chhaih buai reng a, hnawh chhuah a ni ta a ni,” tiin thu an chhuah.
Bar hi ‘Molotov’ cocktail hmangin a vawm zui a ni.
Thil thlen dan hi kimchang zawk hriat tuma chhui zui mek a nih thu leh dikna hlen chhuah a nih tur thu a sawi a, “Sonora-ah hian tumah dan chungah leng an awm lo,” an ti.
He thil thleng hi mi sual pawl pawikhawihna a ni zawk em tih finfiahna a awm lo va, hetiang hian kum tam tak chhung Mexico a lo tuam tawh a ni.