- Ruata
India ramin a nghahhlelh Kia midsize SUV mawi tak mai Seltos chu hmel thar nen kum 2023 model tlangzarh a ni leh ta a, a mawi viau mai a. Rs. Nuai 10.89 (ex-showroom, Delhi) man atangin a intan a ni.
2023 Kia Seltos hi tlangzarh a nih hmain Rs. 25,000 chawiin a book theih tawh a. Hetah hian mi 13,424 lai chuan an book pang tawh a ni a. He SUV hi tun dinhmunah Hyundai Creta tihlohah chuan a awmna huangah chuan SUV hralh kal ber pawl a ni a. Book tu heti zat an awm nghal hian duhtu a ngahzia a tilang mai awm e. Tarlan tawh angin Rs. Nuai 10.89 man atangin a intan a, Rs. Nuai 19.99 man thlengin a awm dawn a, hei hi ex-showroom man a ni thung a, on-road price ang chuan a to hret dawn a ni.
A man tlangpui
2023 Seltos facelift hi trim level pathum – Tech-line, GT Line leh X-Line te a awm a. Naturally Aspirated (NA) petrol version hi Rs Nuai 10.89 – 16.59 man inkar niin, turbo petrol version hi Rs Nuai 14.99 – 19.99 man a ni thung a. Diesel version Rs Nuai 11.99 – 19.99 lakh man inkar a ni thung a. Hei hi ex-showroom, New Delhi mil a ni a, Mizoramah chuan a dang hlek maithei e.
A khawl leh thildang
Kia Seltos facelift-ah hian khawl pathum – 1.5-litre NA petrol, 1.5-litre turbo petrol leh 1.5-litre turbo diesel te duhthlan tur a awm a. NA petrol khawl hian 115bhp power leh 144Nm torque a pechhuak thei a, turbo diesel khawl hian 116bhp power leh 250Nm torque a pechhuak thei bawk a ni. Trasmission lamah chuan 6-speed manual, CVT automatic (NA petrol) leh 6-speed iMT bakah 6-speed automatic gearbox (turbo diesel) te duhthlan tur a awm
Turbo petrol khawl hian 160bhp power leh 253Nm torque a pechhuak thei thung a. Transmission lamah chuan 6-speed iMT leh 7-speed DCT duhthlan tur a awm a. Turbo petrol engine HTK+, HTX+, GTX+ leh X-Line hoah chiah a awm a ni. 1.5L NA petrol, manual gearbox hmang hi HTE, HTK, HTK+ leh HTX trim-ah te duhthlan tur a awm a, iMT gearbox hi HTX trim-ah chiah a awm thung a ni.
Design leh thildang
Kia hian rawng chi thar, Pewter Olive rawng an tih chu Kia Seltos-ah hian an rawn dah thar a, hei bakah hian rawng chi khat (mono tone) rawng chi 8 leh rawng chi hnih inpawlh (dual-tone) rawng chi hnih duhthlan tur an rawn dah a ni. A man to ber chi, Turbo petrol variant hian dual exhaust tip a nei a, GT Line leh X Line hain body kit design hran deuh a nei bawk a ni. Hei bakah hian a man to ho hian 18-inch alloys a hmang bik bawk a ni.
A chhunglamah hian thil inthlak leh thil thar a tam hle a, 10.25-inch connected screen thar pahnih, infotainment leh digital instrumentation a hman tur a nei a. Centre console thar hlak neiin a AC vent te pawh a hma aiin a sin deuh a, HVAC control thar a nei bawk a ni. A chhung han en mai hian a hma aiin a dak nalh a, a chhung an duanna hmanrua pawh a dak nalh zawk hle a, a tha zawk bawk a. A kentel tam tak zingah hian 360 degree camera, dual-zone climate control, 8-inch HUD, electronic parking brake, rain sensing wiper, Bose-tuned 8-speaker system with sound mood lamps leh thildang tha tak tak a kentel a ni.
Himna lam leh a khalhtu tana awlsamna lamah chuan he SUV-ah hian tunlai lirthei changkanga kan hmuh chhhoh mek, advanced driver assistant system (ADAS) a awm dawn a, hemi hnuaiah hian hmanraw hrang hrang – forward collision warning assist, emergency braking, lane assist, blind spot monitoring, leh a dangte a awm ang a. Airbag paruk, ESC, hill-start assist, all-wheel disc brakes, TPMS leh three-point seat belts te chu eng variant-ah pawh a awm vek dawn bawk a. Kia hian panoramic sunroof an rawn dah tawh bawk a ni.
Kan hriat angin Kia Seltos thar hian a chhungah danglamna tam tak bakah a pawn lam design-ah pawh thil thar a rawn nei a. Turbo petrol khawl thar a nei bawk a. A hmalamah bumper thar mawi tak, grille thar lian zawk, headlamp tha, LED DRL awm tel leh L letling pian ang taillamp thar, LED light bar in a thlunzawm mawi tak chu a hnunglamah kan hmu bawk a. A hnunglam bumper pawh a thar mawi tak kan hmu bawk a ni.