Aizawl: Parliament Monsoon session neih meka Forest Conservation (Amendment) Bill, 2023 chu hmarchhak state pangate tana ‘bill sakei’ a tlin avangin theihtawp chhuaha dodal a tul thu ZPM leader Lalduhoma’n a sawi.
ZPM-in nimina an party pisaa chhung inkhawmah Lalduhoma hian Forest (Conservation) Act, 1980 hian a bik takin India hmarchhak State panga – Manipur, Nagaland, Tripura, Meghalaya leh Mizoram-a ramngawte hi a humhalhsak tha hle a. Chu dan ding lai tha tak chu tihdanglam a lo nih a, Mizoram state chhungah central sorkarin awlsam taka ram ngawte thiat a hmunhma an khuar theihna turin he bill hi siam a ni tih a sawi.
Lalduhoma chuan he bill hi ‘Bill sakei’ a tling tih a sawi a. Bill hi pass a nih chuan International boundary atanga boruak mela teha km 100 huam chhunga hman tur a nih avangin Mizoram pum pui a huap deuhthaw thu te, a huam chin chhungah FCA 1980 hmangin ramngaw humhalh a theih tawh dawn loh thu te, sorkar laipuiin ram venhimna leh vantlang mamawh atan a duhna lai laiah hmunhma a khuar theih tawh dawn avangin inchimralna hmanraw tangkai tak a ni dawn niin a sawi.
Tun hma angin Forest Clearance lak a ngai tawh dawn loh avangin awlsam takin ram chu an suasam thei tawh dawn thu te, engmah chawi tawh loin a thlawnin ram an nei thei tawh ang a, ramngaw tihchhiat man chawitir theihna Dan – Compensatory Afforestation Fund Act, 2016 hi hman theih a ni tawh loh tur thute, danin ramngaw tlawhchhana eizawngtu tribal-te hi a humhalh tha tak pawh a hum zo tawh dawn loh thu te, hnam dangin Mizoramah phalna la hmasa lovin industry lian pui puite an din thei tawh tur thu te a sawi bawk.
Lalduhoma chuan India danpui Article 371G in Mizoten ram neitu nihna leh neitu nihna hlanchhawng theitu nihna a pe a. Hemi kalh zawngin parliament-in dan a siam chuan, Mizoram Legislative Assembly-in rem an tihpuina resolution an pass a nih ngawt loh chuan, hman a ni ve lo vang tiin min humhalh a. Tuna bill an put luh hian hei pawh hi a rawn kalh nghal der thu a sawi.
He bill hmang hian Mizoram leilung pum puiah sorkar laipuiin thuneihna chhuhsak a tum mek tih sawiin, “In humhalh bikna dan hrang hrang kan neih mekte chu a hranpaa min hlihsak si lo vin, he bill hmang hian thiam takin, automatic-in min hlihsak dawn tihna a ni. Kan sorkar leh kan MP-te hian hmahruai se, mipuiin an kaiza veng ila, theihtawp chhuaha dodal turin ka sawmin ka ngen a che u,” a ti.