Sports & Youth Ser- vices department leh MZP tangkawpin nimin khan Vanapa Hall-ah Youth-20 Meet on Nationalism, Patriotism & Development an buatsaih a, Deputy Chief Minister Tawnluia leh SYS Minister Robert Romawia Royte ten an hmanpui.
Dy. Chief Minister chuan Y-20 thupui atana thlan -Nationalism, Patriotism & Development- chu tha a tih thu leh thangtharte tan pawha pawimawh tak nia a hriat thu a sawi a. Khawvel hmathlir leh development kawng hrang hranga nationalism leh patriotism pawimawh thu a sawi.
Thalai ten hma an sawna, kawng hrang hrangah an mamawh anga dawmkanga, an tan kawng zau zawk hawnsak chu Mizoram sorkarin a ngaihpawimawh thu leh chumi atana ruahmanna hrang hrang siam a nih thu Dy. Chief Minister chuan a sawi a. Y-20 meet chuan thalaite tan hlawkna a thlen ngei a beisei thu a sawi.
Tawnluia chuan state dang leh ram dangah darhsarh taka ro- relna hrang hrang hnuaia Zohnahthlakte awm lova, rorelna khat hnuaia awm duhna avanga hnam movement chu lo chhuak ta a nih thu a sawi a. Chu hnam thinlung avanga hnam pasaltha, ram tana nu- nna hlu tak hlantu martar te pawh an la hre reng tih sawiin, thang- tharte pawhin ram an hmangaihna chu hre reng se a duh thu a sawi.
Dy. CM chuan Mizoram remna thuthlung chu India sorkarin remna thuthlung a ziahpui tawhte zinga la hlawhtling leh chang- tlung berte zing ami nia sawiin, chu remna thuthlung kal zelah chuan India Danpuia Mizoram humhimna Article 371G in Mizoram a humhim dan te, Mizoramah chuan ram neitu leh a thehthangna chungchangah state pa- wn mi an inrawlh theih loh dan te tel thu a sawi.
Thangthar ten hnam thinlung chu ram innghahna a ni tih leh hmasawnna atan a pawimawh thu an hriat zui zel a duh thu pawh Dy. Chief Minister chuan a sawi bawk.
Sports Minister Ro- bert Romawia Royte pawhin nationalism leh patriotism chu ram leh hnamin hma a sawna, a lo changtlun theihna tura thil pawimawh tak a nih thu a sawi a. History enlet pawhin hnama chiang, hnam anga inphuarkhawm tlat te chu an dingnghet nge nge thin tih a sawi.
India history ah pawh British awpna atanga zalenna an neih theih nana nationalism leh patriotism pawimawh zia a lan thu Robert Romawia Royte chuan a sawi a. “Mizo history ah pawh hnam chhan tura nationalism movement kha lo awm ta lo se chuan hnam dangin min lo chimral thei dawn a ni” a ti bawk.