Khawvel hmeichhe football a world number two ni mek Germany in duhthusam a tha in kumin FIFA Women’s World Cup bul an tan a. A vawikhatna atan khel Morocco chu 6-0 in an hneh.
Melbourne Rectangular Stadium a Thawhtanni a inkhelah hian German captain Alexandra Popp chuan goal hnih khungin a team hmahruaitu a ni a. Euro 2022 final inhliam avanga a khelh loh chu tam takin an team champion zawh loh chhanah an ngai a, German team tana a pawimawhzia nem nghet turin first half-ah goal hnih a tauh lut.
Halftime zawhah Klara Buhl chuan an goal thumna khung lehnghal vatin second half-ah Germany an tlangnel viau. Morocco goal chu na taka bawkin Hanane Ait el Haj leh Yasmin Mrabet ten own goal an neih phah leh bawk.
Huntawp dawn thlengin Germany an hlauhawm a, counter-attack rang tak atangin substitute Lea Schuller chuan an goal hnuhnung ber a khung.
Martina Voss-Tecklenburg pawlte hi an hlauhawm viau a, goal ban vawi hnih an tihper bakah goal khat pawm loh an nei.
Germany hian player pawimawh Lena Oberdorf leh Marina Hegering te inhliam avangin chhawr thei lo mahse an mamawh result an nei thova, tunhnai match 25 an khelh atangin vawikhat chiah an la tlawm.
Inkhel dangah Italy in Argentina lakah 1-0 in hnehna an chang a. Huntawp dawnah striker Cristiana Girelli chuan chakna goal a khung.
Auckland-ah Argentina in Italy hi an chelh mai dawn niin a lang hman a, mahse Juventus striker tawnhriat nei hnem tawh hi huntawp dawn lamah dah luh niin a team a chakpui.