Iran sorkara thuneitute chuan hijab bel lo hmeichhe filmstar thlalak tarchhuah vangin film festival kalpui tum chu an khapsak hmiah.
ISFA Film Festival vawi sawm pathumna neih turah mipui hmuh theiha poster lian tak an tarah an ram danin a phut tlat anga hijab nena inbel lo hmeichhe thlalak chu pawm thei lovin, film festival neih tur thlengin a nghawng an tuar ta a ni.
Irannian Short Film Association (ISFA) hian filmstar lar Susan Taslimini channa, ‘The Death of Yazdguerd’ (1982) poster an tarchhuahah ramchhung dan kalha poster an tarchhuak chu thuneitute beng a thleng rang hle.
Hijab nena inbel thlap hi Iranian hmeichhia tawh phawt te tan chuan zawm ngei ngei tur dan khirh khiap tak a ni a, 1979 Islamic revolution atang khan ramchhunga vung taka kalpui a ni.
Nikum September khan Hibaj tel lova vakchhuah Mahsa Amini (22) chu police station-a hruai a nih hnu-ah a thi zui ta mai a, rampumah kangkai nghalin, hmeichhia tam takte’n Hijab te chu paih thla in, thuneitute lakah lungawi lohna nasa tak an lo lantir tawh.