India-a ram rorelna in, parliament inkhawm chu eptu MP-ten hmarchhaka Manipur-a tharum thawhna thleng sawiho an phutna avangin a ni thumna atan rorel mumal thei lovin a awm leh.
Rorelna in hniha MP thinrim tak takte chuan rorel kaltluang tur chu au buaiin placard lek chhuakin buaina an siam.
Union Home Minister Amit Shah chuan sorkar chu ‘sawiho turin a inpeih’ tih a sawi a; mahse, eptuten sawina hun an pe lo niin a puh let.
Hetih lai hian eptu MP-te hian Prime Minister Narendra Modi-a chu rorelna inah hian buaina chhuak chungchangah thu neia sawi turin an phut.
Manipur-ah hian May thla tir atang khan a mi cheng tam ber, Meitei leh a tlem zawk, tribal Kuki inkarah buaina chhuakin mi 130 chuang an thi tawh a, mi 60,000 vel baihvaiin an awm phah mek.
Pathianni khan US chuan he state-a hmeichhe pahnih, saruaka khawlaia chaih phar lai video darh chungchangah aw a chhuah ve ta bawk.
Hmeichhiate khawlaia saruaka kalpui an nih hi thla thum dawn liam taa thleng tawh kha a ni a; mahse, kar hmasa khan a video hi vantlang hmuhah a darh chauh va, a darh rualin India ram mai bakah khawvelin an demin mi tam tak a tithinrim hle.
US thupuangtu chuan he thil hi ‘rawng’ leh ‘rapthlak’ a tih thu a sawi niin Reuters chuan a tar lang.
India chuan US-in awka a chhuahah hian engmah a la sawi zui lo va; mahse, a hmain US thuneituin Manipur-a buaina chhuakah puih theihna a neih chuan ‘a inpeih reng’ tia a sawi chu Indian sorkar hian na takin a lo khak let tawh thung.
Foreign ministry thupuangtu, Arindam Bagchi chuan US ambassador Eric Garcetti-a thu sawi chu ama mi mal bik chuan a lo hmuh ve loh thu a sawi a; mahse, ram palai inkarah erawh ‘India ram chhunga thil thleng’ chu a sawi duh lo niin a sawi.
Ningania video darhah hian Kuki hmeichhe pahnih chu khawlaiah saruak veka kalpui an ni a, a kalpuitute hi Meitei tamna khuaa mipate niin an nam a, an man bet a, an pawt bawk tih a lang.
He video darha thil thleng lang hi mi tam takin an dem thu an sawi hlawm a, tun thlengin mi paruk man an ni tawh.
Police-a complaint thehluhah chuan hmeichhe pakhat zawk hi pawngsual rawn a ni a. Complaint-ah hian hmeichhe dang pakhat, video-a lang ve lo pawh awmin inphelh ruahtir nia ziah a ni bawk.
A thlenna rei tawh hle sia video a darh hnu chauhva police an che chhuak chuan zawhna a titam hle a, complaint hi thil thlen hnu lawkah thehluh a ni a, mipa lang tam tak chu a video atang ringawt chuan hriat theih tawp a ni seng tawh lo niin an sawi bawk.
Video-a darh hnuah hian Modi-a chuan a dem tak zet tih sawiin ‘a tizak hle’ niin a sawi a, na takin hremna lek a nih tur thu a sawi bawk a; mahse, tun thlengin parliament-ah chuan he thil leh buaina chhuak hrim hrim hi a la sawi ri lo.
Manipur-ah ngei pawh kha thil thleng duh lohna kha lantir a ni a, kartawpah khan mi sang tam tak punkhawm huaihawt a ni a, inhnamhnawihte chu rang taka man an phut hlawm.
Hetih lai hian Manipur thenawm, Mizorama hel pawla tel thin pawlin an rama Metei awmte chu an ‘vau avangin’ Manipur leh Assam-ah an haw hlawm nia sawi a ni.
Hetih lai hian Mizoram sorkar chuan an rama Meitei awmte chu venhimna pein harsatna an tawh loh nan hma an la.
Pathianni khan a vautu pawl pawh hian thuchhuah siamin Mizorama cheng Meitei-te chu an vau lo va, mipui boruak thlirin inralring turin an ti mai zawk’ niin an sawi.