Aizawl: Thawhtannia Mizo Hnam Run inkhawmah MNF President, Chief Minister Zoramthanga chuan MNF chu NDA pawlah tel mah se, policy leh thil tumah NDA thua an kal loh thu leh MNF chu an policy ‘Pathian leh kan ram tan’ tih kalha thil a kal chuan an dodal mai thin tih a sawi.
MNF president chuan NDA kalkhawmah MNF anga do huai tumah an awm lo tih sawiin, “Modi-a intlawnsiak luih luih a ni mai. MNF chu a policy-in Mizoram hnam leh a sakhaw humhim tura ding kan nih angin NDA hi kan hlau lo. MNF hi central sorkar a inthlak avangin kan dinna kan la thlak ve ngai lo,” a ti.
“Uniform Civil Code champion-pui an tum pawh Mizoram Assembly-ah dodal thu kan pass a, Delhi-ah kan theh thla. Tun hnaiah pawh PM hnenah ‘In UCC hi kan do tlat dawn,’ tih ka ziak,” tiin, MNF chuan UCC chu an do tlat dawn tih a sawi bawk.
India politics chu NDA (BJP leh a kaihhnawih) leh UPA (Congress leh a kaihhnawih) anga kal thin a nih thu sawiin Zoramthanga chuan, “Tunah chuan UPA kha INDIA tiin an thlak a. Keini chu NDA group-ah tel mah ila, policy leh thil tumah chuan NDA thuin kan kal lo,” a ti a. MNF-in policy nghet an nei, ‘Pathian leh kan ram tan’ tih kalha thil a lo kal chuan an dodal thin thu a sawi.
Thenkhatin BJP an hlau tih chungchangah, MNF president hian, “Kan hlau awkawng lo! ‘Burma raltlan nawr kir tur’ an ti. Keini chuan kan nawrkir dawn lo, chaw leh an mamawh kan pe dawn tiin house-ah hial ka puang,” a ti a, hmasawnna thilah chuan an thawkho a ni thei, hnam leh sakhaw khawh thilah chuan an thawhho theih loh thu a sawi a. “An tih apiangah ‘Ji Sap’ ti chi kan ni ve lo. Keini tan NDA, UPA, INDIA-in awmzia a nei lo. Keini chu Pathian leh kan ram tan tih hi kan sahal khai a ni. Kan sahal khai nena inmil lo chu kan hnawl vek thin,” a ti.
MNF president hian Manipur buaina a chhuah tirha Manipur CM N Biren Singh nen an inbiak thu sawiin, Mizote rorelna pakhat hnuaia awm thu chu sawi tawh lo tura a ngenna chu, “Tun hnaia kan sawi a ni lo. Oct 22, 1961-a MNF a pian khan Mizo hnahthlak zawng zawng rorelna pakhat hnuaia awmkhawm kan lo tum daih tawh a. India nena kan inbiaknaah pawh kan nawr nat ber a ni. Tuna tihrik thar a ni lo,” tia a chhan thu a sawi.
Inkhawm hi MNF Treasurer K. Vanlalauva’n a kaihruai a ni.