Hmeichhe pawl pathum huaihawtin nimin khan Manipur-a tual chhung buaina kal meka Zohnahthlak hmeichhia laka nunrawnna rapthlak tak thleng duh loh lantir nan Siaha khawpuiah kawng zawh neih a ni.
Mara Chano Py (M.CH.P) Hqrs, Mizo Hmeichhe Insuihkhawm Pawl (MHIP) Sub. Hqrs., Siaha leh Lai Women Association (LWA) Sub.Hqrs., Siaha huaihawt kawng zawh hi chawhma dar 10 khan Siaha Bazar Traffic Point atang tanin New Siaha Vety thleng zawh a ni.
A tanna leh a kharna neihah hian MCHP Hqrs President P. Chaki chuan thu sawiin Zohnahthlak leh an hmeichhiatpui ngei mualpho tak leh rapthlak taka hmeichhe zahawmna tihchhiatsak a ni leh a humhimtu tur zawk mipa thiltih an hmuhin an na takzet tih a sawi a, “Hetiang thil hi thleng nawn atan kan duh tawh lo,” a ti.
He kawng zawhah hian Siaha-a hmeichhe pawl hrang hrang member-te kal chhuak a, New Siaha thlenga kawng zawh hi mi 1,200 chuang an ni.