Colombia in FIFA Women’s World Cup 2023 a an inkhel hmasa berah hnehna an chang a. South Korea lakah 2-0 a chakin Sydney-ah bul an tan.

Sydney Football Stadium a Group H inkhelah hian South American ram tan hian Catalina Usme chuan minute 30-naah penalty atangin goal hmahruai a khung a. Minute kua a liam lehin tunlai hmeichhe football a tleirawl ngaihven hlawh Linda Caicedo chuan Korean keeper Yoon Young-geul chetsual zarah an goal hnihna a khung.

Kum 18 mi Caicedo hi Women’s World Cup chacnhin a goal khung thei naupang ber dawttu a ni a, kum 2003 a kum 17 mi nia Brazil legend Marta in goal a khung chiah ani aia goal khung thei naupang zawk an awm.

Hnehna an chan avang hian Colombia in hmeichhe World Cup chanchina an vawi hnihna atan chiah hnehna an chang.

Lehlamah South Korea in an inkhelh chhungin Colombia tan remchang an siam hnem a. Tlarhnungah leh midfield-ah tihsual an neih an tuar thin.

American thisen kai Casey Phair chu second half-ah luhtir niin kum 16 leh ni 26 chauh a upa hi Women’s World Cup khel thei naupang ber a ni.

A thlengtu hnehtute

Philippines in a vawikhatna atan World Cup-ah hnehna an chang a. Beisei loh result neiin New Zealand lakah 1-0 in an chak.

Wellington a inkhelah Sarina Bolden chuan Philippines tan minute 24-naah hmahruaina goal a tauh lut a. He goal hi New Zealand hian sut tumin theihtawp chhuah mahse an vanduai ni an tawng a. An huntha neih atangin goal an khung thei lo.

Philippines manager Alen Stajcic chuan, “World Cup-ah a thlengtu ram hneh tluka thil hlimawm hi a awm lo. He ram chanchin a hnehna ropui ber zing ami a ni.”

“Kan zavaiin lawm avangin kan biangah mittui a luang. World Cup a hnehna chang tura nghah rei ngaite kan lo hre fo tawh thin. Kan vawi hnih inkhelhnaah kan chak thei hi thil ropui tak a ni.” tiin inkhel zawhah a sawi.