Indian police chuan ‘dan lova’ hmar lam, Uttar Pradesh-a khawsa Rohingya raltlang mi 74 an man tih an sawi a, himna zawnga tharum thawhna tlanchhiatsante an man thin hian dem a hlawh hle thung.
Muslim Rohingya-te hi thingtlang leh khawpui paruk atanga man niin an zinga 10 chu kumtlinglo an ni tih Thawhtanni khan police hian an sawi.
Mipa 55, hmeichhia 14 leh naupang parukte hi Uttar Pradesh-a district paruk atanga man niin ‘dan lova ramri kân’ an ni tih police-in an sawi.
An man zinga pakhat hi nau pai lai a ni tih India-a Scroll.in website chuan a tar lang bawk.
Rohingya Human Rights Initiative campaign group chuan heng mi mante hi Myanmar-a tihduhdahna an tawrh hnua tlanchhia niin heng laiah hian kum 10 chuang an lo khawsa tawh niin an sawi.
Inhlawhfaa ei tur tuakin thenkhat chuan bawlhhlawh an khawn thin niin Initiative Director Sabber Kyaw Min chuan a sawi a. “Himna zawng mai chauh an ni,” a ti.
“Chhuah ngei an nih hi kan duh hle a ni,” a ti.
Rohingya sang tam tak hian Myanmar tlanchhiatsanin India ramri, Bangladesh nen an pan a. Myanmar-ah hian sipaiten an zinga mi sang tel an that a, hmeichhiate pawngsualin an khua an halsak bawk a ni.
United Nations chuan hetianga sipaite chetna hi Rohingya-te suat tumna niin a sawi a, sipai general eng emaw zat lakah thubuai siamsakin International Court of Justice-ah pawh an chungthu ngaihtuah a ni.
New Delhi hi 1951 UN Refugee Convention tih pawm ve lotu a ni a, he inremna ang hi chuan ram dang atanga raltlante chu an dikna chanvo humsaka an himna ngaihtuahsak a tel a, hetiang an ti thei lo a nih pawhin raltlan humna tur dan an neih a ngai a ni.
Nikum kum tir lam thleng khan India-ah hian Rohingya 18,000 vel cheng anga ngaih an nih thu Rohingya Human Rights Initiative dintu pakhat zawk, Ali Johar chuan a sawi.
India-a Rohingya activist-te hi man an nih lohna turin an tlangau nasa a, sorkar chu mihring dikna chanvo humhalhna kawngah leh mipui rorelna kalhmang anga a kal theihna turin an nawr nasa hle.
“Heng an mante hi an chunga dik taka rorelsak kan duh a. Rohingya-te hi mihring an ni a, insuatna an tawrhna laka hima chhuak niin zalenna leh nun nuama khawsak hi an phu ve tho a ni,” tiin Kyaw Min chuan a sawi.
“An mante hi India-a inhumhimna zawnga lut an ni a, pawikhawih leh dan bawhchhia an ni lo. Khawvelin dan a neih te, tun hma lama an chunga ro lo rel tawh danah te leh India danpui ngei tlawhchhan pawhin, anni lo hum hi tih dan tur a ni a. Man zingah hian nau pai lai pawh an awm a, naupang leh pianphunga rualbanlo pawh an awm a, heng mite hi tharum thawhna tuartute an ni,” a ti bawk.