NGO Co-ordination Committee hruaituten nimin chawhnu khan Larsap Dr Hari Babu Kambhampati chu a chenna, Raj Bhavan-ah an hmu a, Prime Minister Narendra Modi hnena thawn tur lehkhathawn, Prayer for Restoration of Peace & Harmony in Manipur chu an theh lut.
NGO-Coordination lehkhathawn hi union home minister hnenah copy theh luh a nih bakah union home secretary pawh copy pek an pe bawk.
NGO Coordination Committee-in prime minister hnena lehkha an thawnah hian thenawm state, Manipur-a buaina kal mekte ngaihtuahin remna leh muanna siam that thuai chu tuna pawimawh ber nia an hriat thu an tar lang a. Tunah hian NGOCC (Mizoram) chuan buaina chhuak nasa state atanga tlanchhia, Mizorama inhumhimna leh inhumhimna zawng mek mi 12,000 chuang Mizoramah enkawl mek an ni tih an tar lang tel.
India ram hotulu ber a nihna angin prime minister hnenah hian thil pawimawh bik leh rang taka chin fel ngai nia an hriatte an ziak a. Hengte hi buaina lian zawk a thlen lohna tura ching fel thuai turin an ngen nghal tih an tar lang bawk.
NGO Coordination Committee lehkha-ah hian prime minister-in uluk taka enfiahsak tura an duhlai thil pawimawh zual, thil thleng pawimawh zual, mihring nunna chân tawh zat, in chhe tawh zat, sakhaw biak in tihchhiat tawh chungchang leh harsatna thleng mek te ziah lan a ni bawk.
NGO Co-Ordination Committee aiawha prime minister hnena lehkhathawna hming ziaktute – Central YMA President R. Lalngheta, MZP President Lalnunmawia Pautu, MSU President Samuel Zoramthanpuia, MUP President Nghaklianmawia leh MHIP President Ngurmawii Sailo bakah Central YMA General Secretary Prof Lalnuntluanga ten larsap hi an hmu a ni.
NGO Coordination Committee Resolution:
- Manipur-ah remna leh muanna a awm theihnan India sorkarin chak takin hma la rawh se.
- Democracy zahawmna tundin anih theih nan sorkar laipuiin a mawhphurhna hlen thuai rawh se.
- Manipur buaina avanga in leh lo chan te, nunna chan te leh hliam tuarte zangnadawmna pek ni rawh se.
- Zo hnahthlak nula pahnih an zahawmna ti bawrhbanga, saruaka khawlai fanpui leh pawngsualtu te lakah an phu tawk hremna pek ni rawh se.
- Manipur buaina avanga N. Biren Sign-a sorkarin Zo hnahthlakte thu buai a siam sak leh jail tang zawng zawng hi chhuah vat ni rawh se.