Tui lian nasa takin a nuai hnu lawkah China khawchhak lam vaukamte chu typhoon na takin a nuai zui leh mek.
Typhoon In-Fa an tih, China-a Yanhua tia an sawi hian an ram sanaa Pathianni chhun dar 12:30 (India-a chawhma dar 10:00) khan Zhoushan khawpuiah tuipui atangin khawmual a lut niin sorkar chuan a puang.
Inkalpawhna hmanruate chu tihtawp vek a ni a, mipuite pawh ina tawm tura hriattir lawk an ni.
Thing kung tam tak a tlu a, hmun thenkhatah tui a lian bawk a. Chhim lama Shangkai khawpui lawngchawlhna atangin lawng tam tak chu khawmual lamah dah kai a ni bawk.
Pathianni tlai thleng khan typhoon hian chhiatna lian tham a thlen erawh hriat a la ni lo.
Typhoon thlen hma lawk hian China ram chanchina tui lian rapthlak ber pawl thlengin an ram lailiah mi 58 velin an thih phah.
Chhanchhuah hna thawktute chuan chhun zan zawmin dam chhuakte zawn hna thawkin mi maktaduai tel chu an mamawh buaipuiin an la buai hle bawk.
Typhoon In-Fa hian ruah tam zawk a thlen zui a rinawm a, thuneitute chuan chhanchhuah leh chhawmdawl hna thawk mek chu a tikhaihlak ang tih an hlau hle.
Typhoon hian darkar khata km 137-a chak thli a keng niin Reuters news agency chuan a tar lang.
Japan-a Meteorological Agency chuan khawthlang hawi zela kalin Hangzhou khawpui a pan dawn niin an sawi.
China-a National Meteorological Center chuan typhoon hian Pathianni atang khan ruah tam tak a thlen mek tih a sawi bawk.
Vaukam vela khawsate chu thlipui, ruah leh tui fawn lakah inveng tha turin an hriattir bawk.