- David Zochhuanmawia (Vida Hrahsel Saza)
Mizo Kristian-te hi Pathian hnam thlan tak tak kan niin a lang a. Thil tam tak sawi tûr awm kârah heti zâwng hian i ngaihtuah ve chhin ang hmiang!
Mizote leh Cancer –
Cancer natna enkawl hautakzia leh damlo tan a chauh thlakzia hi sawi thui a ngai lo. Sam, hmul leh vun tha lâiin a tawrh nasatzia a chiang bawk. Chutih rualin, Cancer natna kan vei a ni tih kan hriat ruala thihpui ve nghal mai theih natna a ni lo hi kan vanneihna chu a ni thung. A rang thei ang ber chi hi ka pa û hian vei vein kar khat lai tha takin a dam a, rilru leh thlarâu damna a chang hman tlat. Rilru, ngaihtuahna lamah sual kawng kan zawh lâi a ni emaw, a ni lo emaw, inhmuhchhuahna hun tha tak Pathianin zofate min pe niin a lang a, Piangthar sa tan pawh hun tha lehzual min pe zâwk niah ka ngai nghet tlat bawk. Zûk leh hmuam kan tih nasatzia, a sum sênso tamzia leh natna tihbaiawm tak a nihzia erawh sawi thui lo i la.
Haw Rûnpui a thleng –
Thingtlanga khaw nei, Aizawla awm tên Welfare dinin, an khawchhuak intawhkhawmna hun hlimawm thei ang bera buatsaihin ‘Haw Rûnpui’ an buatsaih thin a. Mahse, Kristian-te Pathian chuan hlimna lam hawi ni lovin hmun hrang hranga Zofate min ko khawm a, in lungrualna thar nei a, ram siam tha tak tak tûrin ‘Haw Rûnpui’ a buatsaih ni hialin a lang a ni. Kan Mizopui râltlan kan tih mai, an chenna Politics rorêlna tha lo avanga mahni ram, mahni inpui pan, mahni sahimna zawnga Mizoram rawn lût an pung zel a ni.
Mizote hi Kristian sakhua, Pathian nung betu kan ni a. Kan rin leh kan innghahna ber chu tlai ngai lo Pathian a nihna hi a ni. A mite tân ‘Haw Rûnpui’ a siam tih a langchiang hlein a hriat. Khawvel hmun hrang hranga zirna avanga Mizoram chhuahsan, sum leh pai tam tak sêngtute tan erawh a lungchhiatthlak hle a, thlunglû a hai dawn mang e.
Assam, Myanmar, Bangladesh leh Manipur –
Kan ramri dep atangin Mizo engemaw zat haw khawm mekin ‘Haw Rûnpui’ a thleng mek a. A chhan leh avâng pawh kan hre tlang e. Kan ramri thenawmte Sorkar tha lo irhchhuah zel a ni a. Thu lungchhiatthlak tak tak leh thu ngaihnawm loh pui pui kan hre mek zel a. Kan ram pawhin kan tawn buak ve theih reng a ni chungin, Pathianin Mizo Kristian-te a hnam thlan kan ni tih ti langtu ni ngeiin a lang.
In lungrualin phei khai vawr ang –
Hun tha lo leh hun khirh tak kan tawh mêk hi inhmuhchhuahna atan hmang hlauh i la, Khawvela mi vannei berte zinga mi kan ni mai dawn a ni. Kan ram, kan sakhua, kan hnam dinhmun heti a nih mêk lai hian kan ram thenawmte tawn ang kan tawn ve lohna atan harh thar i la, India ram Politics chhiain min tih buai ve lohna atan tawngtai tam ang u. India ramah sakhaw zalenna tha tak a lo thlen a, Politics chhia kan neih lohna atan BJP Party kalphung hi kan dodal a ngai a. India ramah sakhua ang zâwnga hmalak an tumna hi Kristian te’n kan huat a ngai takzet a ni.
Mizorama sorkarna chelhtute pawh an demawm hran lo. Central-ah tupawh sorkar se kan State Budget hi a kiam phah lovin a rinawm a. Kan dawn tûr ang hi chu kan dawng rengin a rinawm. Mahse, BJP thawhpui zâwnga lehkhaa hming ziak (Signature) hial pe duh Ram hruaitu kan neite hi a pawi hlê a, tun hun hi inenfiah nan hmang se, he kan hun tawn mêk hi eng Party pawhin in siamthat nan hman tum ang u. Kan lo ti sual tawh anih pawhin sim i la, Pathian lam i hawi thar leh ang u.
A tlipna –
Mizoramah hian mi tha lo te hi langsar viau thin mah se, mi tha tak tak Pathian tih mi, tawngtai mi engemaw zat kan la nei hi kan vannei hle a. Khawvel hmun hrang hranga chhiatrupna thleng thin Lirnghing nasa tak, Tui lian rapthlak tak, Khaw lum lutuk avanga kangmei chhuak te nei ve lova kan la him chhante hi kan ngaihtuah nawn a hun a. Ram hruaitu tha lovah ram a dam lova, mipui kan him lo bawk a. He kan ‘Haw Rûnpui’ hmanga ngaihtuahna ti tharin, ram hruaitu tha tak kan neih theihna tûrin leh Pathian tih thar tûrin mipuite inbuatsaih i la, tawngtaina nen ama lam i hawi thar leh ang u.
Pathian hnam thlan kan nihna hi chapo pui lovin, insiamthat nan hmang hlauh zawk ang u.