- Zion Lalremruata; Chairman, Vairengte Welfare Committee : Aizawl
Lalmama hi hetiang hian hliamte tawkin a vanduai zingah tang mahsela vuina pakhat mah ka nei lo; Ram leh Hnam chhanna anih vangin ka lawm zawk mahin ka hria”, tiin Pi C.Lalramchuani M/o PC. Lalmuansanga(Lalmama), Venghlun, Vairengte chuan Aizawl Civil Hospital-a an awm laiin min hrilh a ni. Kan hriat theuh angin Assam Sawrkar chuan Dt 26, July,2021 khan a Police zahnih rual aia tam mah te chu thuam famkim nen lo tirin, Vairengte daia Mizoram Police Duty Post chu min lo hnehchhuh a; hemi avang hian inkahna thlengin Assam lamah hian mi pasarih laiin nunna an chan a, Mizoram lamah chuan nunna chan awm lovin PC.Lalmuansanga(Lalmama) hi a hliam na bera kan neih a ni a. Kan kan ni hian Lalmama nu hian Mizoram Sawrkar chungah te, amah duhsak taka enkawltu Doctor leh Nurse chungah te, Bialtu MLA Pu Lalrinsanga Ralte leh ama tana tawngtai saktu leh kantu Mizoram mipuite chungah an lawmzia thu min lo hrilh bawk a ni.
Hei kan ti nek nek a kan khua Vairengte daia inkahna chu a kum hnih cham kan lo thleng leh ta reng mai. Khatia inkah anih hnu khan Assam Chief Minister Himanta Biswa Sharma(HBS) chuan khawvel hriatah thiam chan tum ranin media hrang hrang kaltlangin Mizoram chu chhumlo chatlo in min bei zui ngar ngar anih kha nimahsela, Mizoram mipui ram chhung leh ram pawna awmten theihtawpin kan han bei let a; a tawpah chuan Zofate tanrual zia a hmuhin beih mai mai chi kan nih loh zia a zir chhuak anih kha. Chanchinthar thehdarhtuten an kawm na ah HBSa hian hetiang hian a sawi a ni,”Keini Assam lam chu kan in bei vak vaka Mizoram erawh tangrualin kawng eng kimah an tang tlang a ni’. Ani taka kha ni Dt 26/07/2021 thil thleng avanga Zofa hmun hrang hranga awmte kan tanrual zia leh Mizo Nationalism chawisan a awm kha thil ropui leh chhinchhiahtlak ava ni em!
Hun alo kal zel a, kha mi Nia inkahna hmun Vairengte dai kan tih thin chu tunah chuan Vairengte khaw chhung alo ni ta der mai. Kan Khaw VC leh Mizoram Sawrkar hmalakna in inkahna hmunah khan chhungkaw 70 bawr vel hnenah inhmun pek a ni a, tunah chuan chhungkaw engemaw zahin chen nan an hmang tawh nghe nghe a ni. He mi kawngah hian sum leh paiah Mizoram Sawrkarin harsatna tam tak nei mahse, insak tanpuina bakah Power & Electricity Deptt etc.. lam ten chak takin hma an la a an fakawm hle ani. Tin,Vairengte tlak lam Aitlang lamah pawh kawng tha taka sial anih tawh bakah P&E Deptt lam ten eng an pe tawh bawk a, kuthnathawktute pawn feh kawng tha tak an neih chhoh phah ta zel a ni. Hei mai a ni lo kha mi Nia inkahna a thlen hnu khan Assam lam abik takin Lailapur to Silchar te hian Mizo min en dan a dang tlat tawh bawk(Silchar hi vawi sawm aia tam mah tun hnaiah ka kal a ni). An CM Himanta Biswa Sharma(HBS) a hoin ngam loh chalah chil an hnawm tih chiang takin an hmu ta tih theih awmin Mizo hi min dah sang tlat tawh a ni.
Inkahna a thlen hnu lawk khan Kolasib DC leh SP te kha hmaichhan ngeiah ka zawt ve ve a,’Assam Police ho kan nawr let kawngah hian heti taka in chet na chhan hi enge ni?’, tiin an pahnih hian Mizoram Sawrkar vang a ni e tiin min chhang ve ve bawk a ni. A ni taka, khatih hun laia kan Chief Minister leh Home Minister te a hun taka Ram leh Hnam chhannan dawhthei tak leh fing taka an awm te kha thil mak tak a ni. Tawngkam uchuak leh mahni lar khel miah lova khang hun laia Pu Lalchamliana a han awm te leh huaisen tak leh a tawk chauha Pu Zoramthangan media kaltlanga HBSa a han dah nil te kha thil chhinchhiah tlak tak a ni. Tin, kha mi ni Dt 26/July/2023 a inkah hma leh kah lai khan kan khaw mi tam tak an awm ve reng a, nunna em chan lova Mizoram kan han awm bik te kha min vengtu LALPA kan lama a tan vang a ni kan ti lo thei lovang.