Aizawl: Hachhek biala khaw pathum – Kawrthah, Tuidam leh Kawrtethawveng khuaah Zoram siam thar lehna hun Congress party chuan Inrinni khan an hmang a. MPCC Secretary James Thanghmingmawia, Meriam L. Hrangchal, Executive Member, MPCC ten an hmanpui.
Thusawitu, Meriam L. Hrangchal chuan kum 2023 MLA inthlanna result hian Mizoram, hnam leh sakhua a him leh him loh tur a hril dawn avangin tun tum inthlan tluka Mizoramin inthlan danglam pawimawh hi a la hmachhawn ngai lo tih a sawi a. Mizoram mipui mai ni lo, India mipuiin central leh state tinah Congress sorkar se tih an thlahlel ngawih ngawih tih a sawi a. India leh khawvela political party hausa ber, BJP chuan an sum neih hmachhuanin sorkar leha Hindu lal ram din an tum niin a sawi.
Meriami L Hrangchal chuan Congress-ah hian hmuh theih loh a hmu tih sawiin, “Chu chu Pu Lalsawta hian a keng a ni. Pu Lalsawta chuan Pathianin heti chen min hruai tawh, tuna ka dam chhan chu Mizoram siam that, mipuite sorkar tha pek a ni a. Chu chu Congress party atang hian ka tan a ni,” tiin, Lalsawta Pathian tihna chu Congress party mai ni lo, Mizoramin a chhawr dawn chauh niin a sawi bawk.
MPCC Secretary James Thanghminmawia pawhin, “Tunah hian he bial hi Mizoram mipuiin an thlir che u. Helaiah hian inzahawmna tih bawrhbansak tuma bungrua leh ran ang maia lei tumtuten hma an rawn la mek a. Nangmahni leh in chhuan kal zel tur te, in bial zahawmna humhim tura do a ngai,” a ti.